CONSUMU RESPETU

Yá pasó más d’un mes dende’l 8 de marzu de 2018, un día nel que milenta muyeres y homes de toles edaes, nacionalidaes, etnies y clases sociales salieron a les cais de tol mundu pe pidir, non solo’l fin de toles discriminaciones que sufrimos les muyeres tolos díes, sinon un cambiu pa una sociedá más xusta ya igualitaria. Y ye que les muyeres tamos percorriendo un camín pel que yá nun hai marcha atrás, un recorríu hacia un mundu que tea basáu nel reconocimientu y respetu de tolos seres que vivimos nesti planeta. Porqu’ensín dulda, el futuru sedrá ecofeminista o nun lo sedrá.

La fuelga de consumu foi ún de los exes fundamentales d’esta hestórica movilización, que non solo pretendía evitar el consumu esi día, sinon qu’aspiraba a xenerar una conciencia social pa promover un cambiu na nuesa manera de consumir como sociedá. Yá nun falamos de la violencia que sufrimos les muyeres nel consumu pol meru fechu de ser muyeres, yá que llegamos pagar hasta un 30% más pol mesmu productu qu’un home, sinon que tamién queremos una rempuesta urxente a la terrible crisis ambiental que ta asocediendo anguaño, asina como tener accesu a alimentos sostenibles, producíos por persones que valoren el territoriu, el mediu ambiente y reviven les nueses zones rurales nunes condiciones llaborales dignes.

Queremos una rempuesta urxente a la terrible crisis ambiental que ta asocediendo anguaño, asina como tener accesu a alimentos sostenibles, producíos por persones que valoren el territoriu, el mediu ambiente y reviven les nueses zones rurales nunes condiciones llaborales dignes.

Tenemos qu’entamar a esaminar con llupa l’usu que facemos de los nuesos carrinos de la compra, yá que son la nuesa ferramienta p’algamar la tresformación del nuesu entornu cercanu, y del mundu en xeneral. Quiciás nun somos conscientes de les consecuencies que causa la nuesa manera de consumir. Con pequeñes acciones como mercar productos de cercanía, non solo tamos contribuyendo a xenerar riqueza y empléu nel mediu rural, sinon que tamién ayudamos a menguar la güelga de carbonu que se xenera nesos llargos tresportes de productos dende países mui llonxanos. Per otru llau, con esti consumu de prosimidá tenemos una seguridá alimentaria que mos proporciona’l conocimientu de la procedencia d’estos productos, y valorizamos el trabayu de les persones qu’apuesten por curiar de los nuesos ecosistemes, y vivir y revitalizar el mediu rural.

Con pequeñes acciones como mercar productos de cercanía, non solo tamos contribuyendo a xenerar riqueza y empléu nel mediu rural, sinon que tamién ayudamos a menguar la güelga de carbonu que se xenera nesos llargos tresportes de productos dende países mui llonxanos.

El sistema capitalista lleva munchos años atentando escontra la muyer y los territorios, sobre too los más vulnerables que sufren situaciones d’estrema probeza, y aprovéchase esta situación p’asaltar a les sos poblaciones y ecosistemes a costa d’abastecer los mercaos de los países más ricos. Tenemos qu’entamar a asumir la nuesa responsabilidá solos problemes ambientales y sociales. ¿Nun ye la escasez d’agua, por exemplu, daqué que mos afecta a toles persones del mundu? Too esto entama por un xiru nos nuesos hábitos de consumu, comprar solo los productos que necesitamos y que, amás, valoren la xusticia social, la ética, la solidaridá, la igualdá y la protección del mediu ambiente. Aún tamos a tiempu de correxir la situación. Les persones, como consumidores, tenemos nes nueses manes la posibilidá d’algamar un cambiu global, solo fae falta compromisu. ¡Vamos ponemos en marcha!

El sistema capitalista lleva munchos años atentando escontra la muyer y los territorios, sobre too los más vulnerables que sufren situaciones d’estrema probeza, y aprovéchase esta situación p’asaltar a les sos poblaciones y ecosistemes a costa d’abastecer los mercaos de los países más ricos.

IMG_7955

Abrir/Cerrar comentarios

Responder

El to email nun va ser publicáu. Los caxellos riquíos tán marcaes *

Puedes usar estos códigos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>