Feminismu rural

El 2017 foi’l gran añu de la muyer gracies a tol colectivu de muyeres que salimos a la cai pa reivindicar y lluchar escontra les grandes desigualdaes que sufrimos día tres día, y a un sistema que pretende reprimir los nuesos drechos. Glayamos como hermanes, que nun tenemos miéu al abusu, que queremos que s’acabe la discriminación, y que vamos destruyir esta sociedá heteropatriarcal que mos quier en silenciu.

Ensín dulda, cada día tamos viendo como más muyeres tan sumándose al activismu diario del movimientu feminista. Pero bien ye cierto qu’esti movimientu tien una mayor presencia nel ámbitu urbanu que nel mediu rural. N’España, cuasi un 80% de la población vive en ciudaes, polo que se percibe que la voz de les muyeres rurales nun ta teniendo la mesma presencia nos discursos de les reivindicaciones feministes. Les necesidaes y demandes de les muyeres que viven en grandes urbes nun son les mesmas que les que residen n’entornos rurales.

Les necesidaes y demandes de les muyeres que viven en grandes urbes nun son les mesmas que les que residen n’entornos rurales.

Nel mediu rural les muyeres tuvieron sometíes a los roles de xéneru patriarcales d’una manera muncho más visible que nes ciudaes, y la pallabra feminismu mírase con munchu noxu. Ye verdá que, nesi sen, ye pernecesaria una fuerte pedagoxía nestos territorios, pa tratar de construyir el que podría llamase “Feminismu rural”, qu’algame que la llucha seya de verdá un movimientu global de tresformación social, nel que toles voces tean representaes, y se visibilice la pallabra de toles muyeres y les realidaes qu’elles viven.

Nes zones rurales les muyeres fueron les grandes tresmisores del conocimientu. Conocen mui bien les plantes, los árboles y l’aprovechamientu que d’ellos pueden consiguir pala so alimentación. Tradicionalmente, elles dedicaron el so trabayu, amás de a les xeres del curiáu del núcleu familiar, a l’agricultura, ganadería, y tamién, al caltenimientu del monte. Esto quier dicir que defendieron fuertemente la so tierra de la esplotación abusiva que pretendía arrebatar el so mediu de vida, porque como plantega l’ecofeminismu, “el sistema capitalista atentó escontra la muyer y los territorios”.

Nel añu 2015, los líderes mundiales algamaron un compromisu pal desarrollu sostenible que ta plasmáu en 17 oxetivos. Los Oxetivos de Desarrollu Sostenible consisten en 169 metes a trabayar nos prósimos 15 años. L’oxetivu númberu 5 diz asina: “Algamar la igualdá ente los xéneros y empoderar a toles muyeres y les nenes”. Pa entamar taría mui bien saber qué entiende’l sistema por empoderamientu femenín. Munches muyeres nun tienen accesu a un sistema educativu de calidá, atención mélica, o, como en munches zones rurales, nun hai servicios básicos fundamentales. Romper estes barreres estructurales ye esencial pa llograr l’empoderamientu femenín a nivel global. Pero nun podemos nim queremos quedanos con un empoderamientu de segunda o tercera. Queremos el poder real, queremos tener presencia y representación propia nos procesos de toma de decisiones, y queremos que la voz de toles muyeres y nenes s’escuche, se tenga en cuenta, y que s’executen les nueses demandes pa consiguir una vida llibre que nun tea sometía a un réxime que mos tien preses.

Queremos el poder real, queremos tener presencia y representación propia nos procesos de toma de decisiones, y queremos que la voz de toles muyeres y nenes s’escuche, se tenga en cuenta, y que s’executen les nueses demandes pa consiguir una vida llibre que nun tea sometía a un réxime que mos tien preses.

Les muyeres debemos ser les protagonistes de la nuesa hestoria propia, pero siempre entendiendo ya incorporando la diversidá de los diferentes territorios y problemátiques asociaes dende la llucha colectiva. La muyer rural tuvo hestóricamente invisibilizada y nosotres debemos tratar de romper esto. Los sos problemes son los nuesos problemes, y los sos deseos tamién son los nuesos. Elles son les protectores de los paisaxes, les garantes del caltenimientu de la vida y les encargaes de curiar la tierra que mos alimenta. Debemos lluchar pol so drechu a ser escuchaes, y facer de les sos reivindicaciones la nuesa llucha. ¡Sororidá amigues, sororidá, pa impulsar la tresformación del mundu!

DSC_0059

LA REVOLUCIÓN DEL MEDIU RURAL ENTAMA NA TO NEVERA

- ¡Qué pena! Tolos pueblos tan quedando ensín xente

- Si. Tienes tola razón. ¿Y qué crees que podemos facer pa evitalo?

- Pues nun sé. Esto ye llabor de los nuesos políticos, pero como nun se pongan les piles,… mal van dir les nueses zones rurales

- Pero dalgo podremos facer, ¿non? ¿Onde faes tú la compra, por exemplu?

- Pues normalmente voi mercar al Alituerka, o nel Cincafour, pero a vegaes tamién en Mercamuyer.

- Si, tienes razón. Nun podemos facer nada pol mediu rural que nos arrodia.

“Lo más revolucionario qu’hai ye tener un güertu”. Esta afirmación que persones como Vandana Shiva o Gustavo Duch lleven años reivindicando, reflexa perbién la situación que tenemos angüaño. Tamos delantre d’un escenariu nel que la población acude, con mayor frecuencia, a grandes superficies pa facer la compra del día. Esti tipu d’empreses tan siquiera comercialicen productu llocal o de temporada, y especulen col preciu de los alimentos, dexando a los productores, munches vegaes, arruinaos o malviviendo. Yo diría más lloñe con esta reflesión: “lo más revolucionario qu’hai ye consumir productos llocales”.

Esti post entamaba con una “hipotética conversación”, pero cada día más real y habitual. Siempre lleemos na prensa, reportaxes, documentales o nes nueses redes sociales, noticies sola agonía del mediu rural español. Los nuesos políticos siempre tan llanzando midíes pa da-y un puxu al sistema campesín español, anque siempre por mediu de sovenciones, y otru tipu aiciones que siguen esa mesma filosofía, y pa les que tan siquier contaron o s’aconceyaron cola población afectada. A mí prestaríame facer llabor d’investigación na nevera d’un representante políticu, sobre too, los que trabayen en mediuambiente y/o desarrollu rural. Deberíen ser les primeres persones en dar exemplu, n’echar un gabitu a los pequeños empresarios agroalimentarios pa que puedan vivir y trabayar nel so territoriu, asina como de la so profesión, porque los nuesos ganaderos, agricultores, abeyeros, queseros,…etc., son los auténticos caltenedores del paisaxe. La nevera o la despensa ye l’arma que tenemos toles persones pa facer la revolución. La nevera ye la ferramienta que podemos utiliar pa que pueda espoxigar el mediu rural.

La nevera o la despensa ye l’arma que tenemos toles persones pa facer la revolución. La nevera ye la ferramienta que podemos utiliar pa que pueda espoxigar el mediu rural.

¿Dalguna vegada te paraste a güeyar l’orixe de los alimentos? Últimamente ta mui de moda analizar si los productos que tamos consumiendo tienen aceite de palma, o otros ingredientes que nun favorecen a la nuesa salú. Esta técnica ta mui bien, yá que ye perimportante qu’entamemos a tar concienciaos so esta problemática perxudicial pa la salú y el mediuambiente, pero hai otres variables que son igual de graves. Por exemplu, mercamos pescáu, carne o frutes que vienen d’América o Asia, que lleguen al nuesu supermercáu al traviés de dellos intermediarios, y que tan mercaos al productor a precios mui baxos. Nun tenemos nengún tipu de garantía de calidá, nin seguridá alimentaria so estos productos. Nun tenemos nengún conocimientu sol procesu de producción, o los agrotósicos que s’utilizaron a lo llargo del so ciclu productivu, o pal so caltenimientu. Nel meyor de los casos, suponiendo qu’esi productu tien un sellu o certificáu ecolóxicu, ¿nun vamos pensar na güelga de carbonu que xeneró esi productu hasta llegar a la nuesa nevera? Ye como si esos detallinos fueren coses que nun nos esmolecen, y que val más nun pensar nello, o que nun nos paez que tenga importancia.

Si, amigxs, comprar productos direutamente al productor, o en tiendes de cercanía, de confianza, y qu’apuesten pol comerciu llocal ye un actu revolucionariu. Non necesariamente ye pagar más por un productu, nin tampoco ye evitar intermediarios p’aforrar perres, sinon que ye apostar y confiar en que’l productor tenga un preciu xustu, y que consiga una dignidá llaboral. Ye apostar por fixar población nel mediu rural y fomentar la producción de variedaes y races autóctones que s’alcuentren en peligru de desaniciu, y que, al mesmu tiempu, estes actividaes agroganaderes, beneficien a los ecosistemes, a los paisaxes, a la biodiversidá y a les persones que caltienen y conserven les nueses aldees. Dende un puntu vista egoísta del ser humanu, ye poder disfrutar de territorios vivos y curiaos nel nuesu tiempu llibre. Pero trátase tamién de saber lo que compramos y lo que comemos, de tener una seguridá alimentaria que mos certifique que nun tamos envelenándonos a nós mesmos, nin que tamos perxudicando’l planeta nel que vivimos, y que queremos dexar pa les xeneraciones venideres. Esti ye ún de los actos d’amor incondicional más noble, y de respetu al nuesu entornu más cercanu. Tamos impulsando una cadena de bona voluntá qu’entama nes nueses cases, onde les nueses neveres y despenses recuérdennos que gracies a les nueses pequeñes aiciones podemos llegar a facer grandes coses.

Tamos impulsando una cadena de bona voluntá qu’entama nes nueses cases, onde les nueses neveres y despenses recuérdennos que gracies a les nueses pequeñes aiciones podemos llegar a facer grandes coses.

IMG_3165

LA EDUCACIÓN AMBIENTAL TAMIÉN YE PAL BRANU

El branu ye la época del añu na que más visitantes s’averen a les playes, los espacios naturales protexíos y los entornos rurales. Los viaxeros, aprovechando los sos descansos y vacaciones, invierten el so tiempu llibre en descansar y descubrir nuevos llugares. Pero, ¿por qué nun podemos aprovechar esta situación pa llanzar mensaxes a la población sol nuesu patrimoniu natural y la importancia del so caltenimientu?

El primer puntu nel que quiero deteneme son les playes y les dunes. Quiciabes, porqu’estos ecosistemes son los que mayor impactu reciben durante la época estival. El mediu llitoral ta compuestu por dellos ecosistemes, muy fráxiles y sensibles a alteraciones antrópiques. Les dunes son barreres naturales que sirven de proteición natural, pero tamién son almacenes de sable pa que podamos disfrutar d’un día relaxáu na playa. ¿Saben esto los turistes? ¿Por qué nun podemos aprovechar esti fluxu masivu de visitantes pa conocer la so importancia? Una actividá con nenos y nenes; o un panel interpretativu pa conocer la flora invasora, les especies de páxaros, la biodiversidá en peligru de desaniciu o el valor de nun tirar basories nun espaciu tan delicáu ye básico pa conocer, valorar, respetar y defender l’entornu que se ta visitando, y otros asemeyaos. Ensín dulda, tamos perdiendo una gran oportunidá de concienciación ambiental.

 

_DSC0049

 

Los Parques Nacionales, Parques Naturales o Reserves de la Biosfera son tamién espacios que reciben una bayura de visitantes diarios en branu. Dalgunos, incluso, por enriba de la so capacidá d’acoyid, lo cual pue mancar gravemente al paisaxe d’una manera irreversible, ya incluso a la población llocal, en llugar de beneficios. Nestos territorios, per un llau, debemos maravillanos cola espléndida biodiversidá y xeodiversidá que caltienen, y per otru, tamién del paisanaxe que supo caltener esti patrimoniu. Les entidaes públique promocionen perbien estos espacios, pero por qué non tamién echar un gabitu pa educar soles especies de flora y fauna más emblemátiques qu’hai, o los materiales de los que ta compuestu l’espaciu protexíu. ¿Por qué non promocionar y promover el consumu de productos llocales? La educación ambiental debe dir de la mano del desarrollu rural, porque si una zona queda deshabitada tamos perdiendo sieglos d’historia, de cultura y de conocimientu autóctonu del territoriu. Tamos perdiendo a los nuesos indíxenes.

La revolución entama por pequeñes coses, en pequeños llugares, y con “muncha xente pequeña faciendo munches pequeñes, pero grandes coses”. El branu ye la perfeuta oportunidá pa que los mensaxes de los árboles, les plantes, les roques, los animales, los indíxenes o los paisaxes lleguen a los visitantes. La educación ambiental tamién ye pal branu.

Cola premisa que tolos y toles educadores ambientales tenemos de que sólo se puede protexer y caltener aquello que se conoz y se valora, el branu ye una perbona oportunidá de cambiar el mundu. Hai aspectos del nuesu entornu nos que les persones enxamás nos fixáremos, quiciabes porque nadie nos lo ensañare o falare so ello. Por ello, esta época preséntase como un gran momentu pa la metamorfosis. La revolución entama por pequeñes coses, en pequeños llugares, y con “muncha xente pequeña faciendo munches pequeñes, pero grandes coses”. El branu ye la perfeuta oportunidá pa que los mensaxes de los árboles, les plantes, les roques, los animales, los indíxenes o los paisaxes lleguen a los visitantes. La educación ambiental tamién ye pal branu.

Ella

Ella llegó a esti mundiu cuando los árboles taben despertándose del so dulce descansu ivernal. Los raitanes y los malvises, animaos polos cada vez más intensos rayos de sol, llenaben de gayola les mañanes colos sos cantares de cortexu. La naturaleza entama un nuevu ciclu de vida. L’estruendu de la metralla, y los glayíos de sufrimientu taben dexando de sentise, anque dacuando tovía había díes grises nel entornu, y les griesques podíen sentise a varios kilómetros de distancia. Lo que taba por llegar nun paecía esperanzador, pero la ida nun yera una eleición n’aquella época. Yera una dura prueba qu’había que superar ca minutu tolos díes.

Los sos primeros años de vida fueron dafechu instructivos, nel que los xuegos y les vivencies infantiles yeren más bien ocasionales. Primero entamó la so formación reglada, p’aprender los básico que necesitaba pa la vida, ye dicir, a lleer, escribir y facer cálculos cenciellos. La siguiente fase, y la más importante, la formación non reglada, na que la primer leición yera mantenese al marxen de tolo que taba socediendo na redolada. Ella debía ser “políticamente correcta”. Ella formose como economista, contable, maestra, enfermera, cocinera, comercial, esperta en loxística, diseñadora de moda, ganadera, ecóloga, agricultora, xestora de residuos, inxeniera forestal,…, Ensin llegar a consiguir nengún título sabía más que cualisquier universitariu, porque yeren leiciones que’l llaboratoriu de la vida y la escuela del tiempu-y enseñaren. Ensín llugar a duldes, la so formación más esixente y complexa foi la de muyer y madre, porque esi debía ser el so oxetivu principal. Años dempués emprendió el so primer trabayu en práctiques. La so xornada entamaba a les 6 de la mañana, atendiendo les necesidaes de los sos padres, güelos, hermanos o sobrinos. Ella debía tar mui atenta a toles necesidaes de caún de los miembros de la unidá familiar, pero tamién del curiáu de la casería. Ella siempre tuvo munchu trabayu, pero enxamás pudo tener un empléu, porque en tola so vida, hasta que quedó viuda, nun tuvo nengún ingresu económicu pol desendolcu de les sos xeres.

Y entós llegó él. N’aquella época la eleición d’un maríu yera un meru trámite, ocasionalmente impuestu por un entornu social atemorizáu de qu’ella “fuera quedase pa vestir santos”, y más cuando yes la última fía casadera de los tos 12 hermanos, y recae sobre ti la responsabilidá de velar pol curiáu de tos padres. La vida nun paecía que fuere camudar a meyor, sinon que diba faciéndose cada vegada más cuesta arriba. Como a la mayoría de los homes del valle, a él tocó-y la mina, y abandonar la economía campesina, lo que-yos podía asegurar unos escasos ingresos diarios, anque eso fuere a cambiu d’arriesgar la so vida tolos díes. Primero a Clavelina, lluéu a Les Abeyes, más tarde a Polio, y asina cambiando de “chamizu” sigún mandaba’l patrón. Ella desconocía si al final del día, cuando los últimos rayos de sol allumaben l’aldea, él diba tornar a casa. Porque n’aquel tiempu les entrañes de la tierra taben ferviendo, y munchos compañeros enxamás regresaben. De fechu, yá perdiera la cuenta de toles compañeres a les qu’echara un gabitu dalguna vegada na via. Soles, con dellos fíos, y ensín nengún tipu d’ingresu. Pero nun había tiempu d’esmolecese, porqu’ella asumió con resignación la xerencia del núcleu familiar y la casería. Ella yera una verdadera heroína, ensín capa nin antifaz, y a la que la hestoria nun va reconocer en nengún tiempu.

Ella primero foi fía, lluéu muyer, a continuación madre, más tarde güela, y, no cabero, viuda. Munchos títulos que foi teniendo a lo llargo la vida, pero, nin ella mesma, nin la sociedá, fueron quien a reconocela como “simplemente ella”. Ella nun sabe qué ye’l feminismu, nin les contribuciones de Simone de Beauvoir o Clara Campoamor a la hestoria de la emancipación de la muyer, a la so hestoria. Tampoco tien el menor interés en conocer toos estos detalles, y claramente nun-y importa. Nunca necesitó dir a manifestaciones, porque “eso nun va con ella”, pero los sos mensaxes de llibertad calaben alrodiu d’ella como l’orbayu fae que medren los cultivos con fuercia y vigor. Ella nunca sintió que coles sos pallabres, non solo taba cambiando’l so entornu, sinon que taba tresformando’l mundu. Del mismu mou, nenguna vegada intuyó que la so capacidá de supervivencia ante la adversidá foi una inspiración pa munches muyeres. Too un exemplu de llucha y superación.

Elles, lluchando en comunidá, conformaron una época exemplarizante de solidarida y xuntanza nel valle, porque la so batalla yera la mesma, y el so sofitu y comunidá yera clave pa salir alantre, xuntas, como compañeres y hermanes. Nun tuvieron nengún miéu, porque nun taben pensando nelles, sinon que simplemente suañaben con una vida meyor pa les que veníemos detrás. Pa que nosotres pudiéremos decidir y escoyer llibremente, y qu’eso pudiera aportanos un futuru meyor. Pa ser “simplemente nosotres”.

 

DSC_0059

 

Escritu en Turón el día 14 d’abril de 2017

Homenaxe a la muyer rural del Valle Turón. Porque “ella” nun ye una única muyer, sinon que sois toles muyeres que lluchastéis pol nuesu presente/futuru y la nuesa llibertá.

EMPRENDIMIENTU Y TRESFORMACIÓN SOCIAL

Anguaño vivimos un períodu llaboral confusu, nel que la solución pa tener un trabayu remuneráu paez que pasa pol autoempléu. Nos últimos tiempos, les pallabres emprendedor/a y/o emprendimientu paecen tar de moda, ye dicir, l’aniciu d’un negociu, baxo la forma xurídica que seya. Pero, recientemente, esto dio un xiru de 180º, yá que cada vegada más persones opten por emprender una actividá, al mesmu tiempu que xeneren beneficios sociales y/o meyores ambientales nel so entornu direutu. Hai poco preguntábenme: “¿Cómo te ves nun futuru nel to trabayu?” La mio rempuesta foi contundente, y ensín necesidá de pensar demasiao, quiciabes d’una manera utópica, pero convencía d’ello, respondí: “Tresformando’l mundu”.

Hai poco preguntábenme: “¿Cómo te ves nun futuru nel to trabayu?” La mio rempuesta foi contundente, y ensín necesidá de pensar demasiao, quiciabes d’una manera utópica, pero convencía d’ello, respondí: “Tresformando’l mundu”.

Cada vegada hai un mayor númberu d’empreses que quieren ser sostenibles, y esto solo va algamase trabayando d’un mou direutu coles persones: clientes, sociedá, entornu, empleaos o proveedores, ente otros. Porque, al final, les empreses que lluchen por un cambiu social son empreses sostenibles, entendiendo esto como la triple cuenta de resultaos: económica, social y ambiental. ¿Qué queremos les persones que nos dedicamos al llamáu “emprendimientu social o sostenible”? Pues que gracies a los nuesos servicios, productos, actividaes,…etc., tengamos la posibilidá de tener un entornu más xustu ya igualitariu, nel qu’esistan oportunidaes pa tol mundu, integrando a tolos colectivos sociales, pero tamién impulsando midíes que promuevan la proteición ambiental y la llucha escontra’l cambiu climáticu.

Mui guapo y mui utópico, pero, ¿esto ye real o yes una ONGD? Si, esto ye real, y nin yo, nin nenguna de les persones que trabayen n’emprendimientu social somos ONGD’s. Anque hai que reconocer que ye muncho más duro entamar un negociu d’estes carauterístiques que cualisquier otru, porque pa entamar, toles persones qu’integren l’equipu debemos tener sueldos dignos, o un repartu equitativu de les ganancies. Si esto nun se cumple, entós nun ye una empresa sostenible, nin muncho menos quier promover un cambiu social. Tampoco voi pidir perdón por querer ganame la vida, ye dicir, faigo servicios de consultoría ambiental, de turismu sostenible, asistencies técniques de desarrollu rural, educación ambiental,…etc., servicios que, pa determinaes persones o colectivos, deberíen ser de baldre. Pues bien, NON. Ye’l mio trabayu. El tiempu qu’invierto en preparar les actividaes, en visitar los territorios, n’investigar estratexes que favorezan el desendolcu sociu-económicu d’un territoriu,…etc. Too esto lleva munchu esfuerzu, xera y conocimientu, y toles persones necesitamos dineru pa vivir. Que yo decidiera llevar a la práctica nel mio trabayu una filosofía de vida nun quier dicir que tenga que facelo de baldre.

¡Qué sí, qué sí! Qu’esto ye perguapo, pero pon exemplos prácticos. Pues imaxina una empresa d’alimentación que decide pagar el preciu xustu a los sos proveedores, apostar pola venta de productos Km0 y/o ecolóxicos y evistar l’usu de bolses de plásticu ente los sos clientes. O una empresa que forme y trabaye con muyeres con dificultaes d’accesu al mercáu llaboral (pol motivu que seya), o persones con discapacidá. Ensín qu’esto condicione’l llevase ayudes y/o sovenciones públiques que favorezan estes contrataciones. Pongamos el casu d’una empresa d’apicultura que solo venda’l miel que produz (a ser posible nun entornu cercanu), ensín echar pesticides o fertilizantes, preocupándose pola biodiversidá llocal y pola restauración d’elementos patrimoniales. O, per otru llau, empreses qu’aprovechen la recoyía, llimpieza y tresformación de residuos, aceite usáu, pa xenerar subproductos y dar una segunda oportunidá a estos restos que terminaríen enterraos o incineraos…etc. Por últimu, una axencia de viaxes que promueva práctiques ambientales y sociales responsables ente los sos clientes, con actividaes comprometíes col territoriu visitáu y pagando precios xustos a los sos collaboradores. Toos estos exemplos, y munchos más, esisten, son reales y rentables, y podrían esplicase con munchísimu más detalle caúna de les esperiencies descrites.

L’emprendimientu social o sostenible ye una doble oportunidá. Per un llau tamos xenerando un beneficiu económicu, non sólo a nós mesmos, sinon a los nuesos empleaos, collaboradores, proveedores,…etc., Per otru, lluchamos por meyorar los nuesos entornos. Trabayamos pa cambiar el mundu. Lo único que pedimos ye que se favoreza la esistencia de polítques públiques qu’echen un sofitu a esti tipu organizaciones, non solo con accesu a fuentes de financiación, sinon con visibilidá, con centros d’asesoramientu públicu gratuitos, con información o con incentivos pa entidaes que promuevan el bientar social y ambiental de la población. Simplemente, que nun nos pongan problemes a la hora d’entamar una actividá llaboral qu’implique fines sostenibles.

 

Lo único que pedimos ye que se favoreza la esistencia de polítques públiques qu’echen un sofitu a esti tipu organizaciones, non solo con accesu a fuentes de financiación, sinon con visibilidá, con centros d’asesoramientu públicu gratuitos, con información o con incentivos pa entidaes que promuevan el bientar social y ambiental de la población. Simplemente, que nun nos pongan problemes a la hora d’entamar una actividá llaboral qu’implique fines sostenibles.

LA SOSTENIBILIDÁ DEL TÉRMINU SOSTENIBLE

Sostenibilidad y Greenwashing

Nun cabe dulda qu’últimamente tan bombardeándonos col términu “Sostenibilidá”. Tolo que nos arrodia paez más sostenible de lo qu’enxamás fuere: la nuesa alimentación ye sostenible, el turismu tamién ye sostenible, los nuevos edificios que se tan construyendo son sostenibles, la minería ye sostenible, y munches empreses multinacionales yá son sostenibles tamién. Pero, ¿qué significa esti términu?

Pa un gran porcentaxe de la población, el términu sostenible ye sinónimu d’ecolóxico, verde o “environmental friendly”, y esto nun ye del too correctu. Si consultamos la definición que nos diz el diccionariu de Real Academia Española, tenemos “especialmente n’ecoloxía y economía que se puede mantener durante llargu tiempu ensin agotar los recursos o causar grave dañu al mediu ambiente. Desarrollu/Economía Sostenible”. Pero esta definición, baxo’l mio puntu vista, tien delles coses perimportantes que-y falten.

L’orixe del términu sostenible surde na década los 80, analizando los problemes ambientales que taben siendo detectaos na época, pero tamién lo que taba socediendo na sociedá, y la so rellación y responsabilidá ante los mesmos. Sigún los espertos, sostenibilidá ye “atender les necesidaes d’anguaño, ensín comprometer la capacidá de les xeneraciones futures d’atender les suyes, garantizando l’equilibriu ente crecimientu económicu, cuidáu del mediu ambiente y el bientar social”. Ye dicir, la sostenibilidá nun debe sólo curiar, respetar y caltener el mediu ambiente, sinon que la sostenibilidá debe ser social, ambiental y económica. Ye lo que se conoz como la Teoría de la Triple Sostenibilidá.

Y equí vienme a la tiesta la pallabra “Greenwashing”, una pallabra qu’últimamente repito con muncha frecuencia. Porqu’esto nun dexa de ser un llaváu d’imaxen de les empreses, pero tamién de la sociedá en xeneral, que se reflexa mui bien nos númberos: cantidá de tonelaes de CO2 que compensamos, porque nos esmolez el cambiu climáticu, dineru que donamos pa campañes de caltenimientu de la biodiversidá, kilogramos/tonelaes de materiaes que reciclamos o reutilizamos. Toos estos exemplos, por supuesto que son pernecesarios y urxentes, pero estes actuaciones, por si soles, nun nos faen ser más sostenibles, si nos escaecemos y vamos alloñándonos de los otros pilares de la sostenibilidá.

Habría munchísimes coses que comentar o criticar, y posiblemente esto va llevamos dellos (o munchísimos) artículos, pero quiero qu’esti seya un primer acercamientu xeneral a esti conceptu. La sostenibilidá ambiental, polo que se ve, “domínase”, agora bien, ¿qué socede colos otros dos pilares de la sostenibilidá? Sostenibilidá económica y sostenibilidá social. Ensín dulda, vivimos nun mundu con altos índices de probeza onde millones de persones pasen muncha fame; vemos a diariu grandes desigualdaes salariales y sociales; discriminación llaboral por cuestiones de xéneru, raza o condición sexual; poblaciones ensín accesu a agua y saneamientu; y una producción y consumu nada responsables. ¿Nun forma esto parte de la sostenibilidá?

Por citar dalgún exemplu, el casu más mediáticu, polémicu y sangrante ye’l casu de “Les Kellys”, les camareres de pisu. Estes muyeres encárguense de la llimpieza de los hoteles recibiendo unos ingresos que, rara vez, superen los 2€ por habitación. Munchos d’estos hoteles pertenecen a grandes cadenes hoteleres, con un departamentu de Responsabilidá Social Corporativa que s’encarga de destacar los compromisos sociales y ambientales de les mesmes, y alaba la so solvencia económica. Amás, dalgunos d’estos (lluxosos) agospios tienen dalgún tipu de sellu o distintivu de Turismu Sostenible o Responsable. ¿Qué pasa que Les Kellys nun cuenten nesti tipu de compromisos o certificaciones?

Somos más de 7.000 millones de persones nel mundu. Estímase qu’en 2050 vamos ser 9.000 millones. ¡Esto ye nada! Ensín llugar a duldes, el mediu ambiente (enteru) ye la nuesa gran xera pendiente, pero les persones que tenemos cerca, los nuesxs empleaos, clientes, collaboradores o proveedores, tovía nun tan nin metíos dientro de la llista.

¡Seamos responsables, sosteniblemente responsables!

¡FELIZ 2017! AÑU INTERNACIONAL DEL TURISMU SOSTENIBLE PAL DESARROLLU

Feliz 2017

A finales del añu 2015, l’Asamblea Xeneral de la ONU declaró al año 2017 como l’Añu Internacional del Turismu Sostenible pal Desarrollu. Esti reconocimientu nun tien sólo la intención de valorar la importancia d’esta actividá económica, sinon implicar pa que los turistes, empresarios turísticos y organismos públicos tomen conciencia de la necesidá d’impulsala y desendolcala d’un mou responsable.

El turismu ye’l principal motor económicu de munchos territorios. N’España representa cuasi’l 12% del PIB. Esto quier dicir que deben desendolcase estudios urxentes sola capacidad de acoyida de los destinos pa evitar una masificación de visitantes nellos. El patrimoniu natural y cultural nun ye un recursu renovable, y por ello, nun deben causase daños solos paisaxes, nin tampoco molestar a les persones qu’habiten neses zones, como socede en numberosos núcleos rurales.

Otra cuestión importante qu’hai que tener en cuenta pa practicar un Turismu Responsable ye tomar conciencia de la identidá que la zona que tamos visitando, ye dicir, descubrir la cultura, hestoria y tradiciones llocales; tastiar la gastronomía; esperimentar tolo auténtico que fai únicu a un territoriu; pero, sobre too, respetar al másimu’l paisaxe y el paisanaxe. Esto ye una manera de promover el conocimientu del patrimoniu cultural, pero tamién seremos garantes del so caltenimientu y proteición.

Esperamos que la declaración del añu 2017 como Añu Internacional del Turismu Sostenible pal Desarrollu seya’l primer pasu pa que’l Turismu Responsable nun se quede nuna práctica esceicional. Confiamos en qu’esti reconocimientu seya la base y el motor p’algamar que toles persones que trabayamos nel sector turísticu mos impliquemos en lluchar pa que los tres pilares básicos de la sostenibilidá (l’económicu, el social y l’ambiental) puean vese reforzaos. Porque si les persones trabayamos pol bien común, entós, vamos cambiar el mundu.

Dende Lláscara, deseámosvos unes felices fiestes en compañía de los vuesos seres queríos, un bayurosu añu 2017 enllenu felicidá, Educación Ambiental, Ecoturismu y esperiencies auténtiques.

¡Gracies por tar con nós!

Ecoturismo en Asturias

EL PATRIMONIU XEOLÓXICU Y EL SO POTENCIAL COMO RECURSU TURÍSTICU

Si ficiéramos una encuesta a la población so cuántes persones ficieron dalguna vegada Turismu Xeolóxicu, de xuru que poques responderíen con un si. En cambiu, si la entruga fuere “¿Tuviste dalguna vegada n’El Teide, Llagos de Cuadonga, La Garrotxa, Costa Vasca, Monfragüe,…? Entós, la respuesta ye mui posible que si fuere afirmativa. Podría dicise “si, usté fizo Turismu Xeolóxicu, anqu’enxamás naide-y lo esplicare, y por eso, desconocíalo.
El Turismu Xeolóxicu, que nun ye sinónimu de Xeoturismu, ye una manera de disfrutar del paisaxe en tol so esplendor. Trátase de pescanciar cómo se forma’l relieve, les roques y los fósiles, entre otros recursos xeolóxicos. Ye una forma de conocer la nuesa hestoria. Una hestoria de cuasi 4.600 millones d’años, y la evolución de los nuesos paisaxes. Ensín dulda, la xeoloxía ye la base pa entender y enriquecer dellos conceptos y actividaes sola flora y la fauna (los suelos solos que se desendolquen les plantes, y les roques nes que viven dellos mamíferos y aves). Pero tamién ye importante pa descubrir el patrimoniu etnográficu y monumental. El Patrimoniu Xeolóxicu ye dafechu trasversal a la nuesa hestoria. ¿Por qué entós siempre nos escaecemos d’esti recursu turísticu con un potencial interpretativu tan grande?

Salto del Gitano. Parque Nacional de Monfragüe

Salto del Gitano. Parque Nacional de Monfragüe

 

El Turismu Xeolóxicu nun ye lo mesmo que’l Xeoturismu

 

España ye un llaboratoriu xeolóxicu al aire llibre, y yá cuenta con dalgunos destinos que s’animaron a apostar por una estratexa de Turismu Xeolóxicu. A lo llargo y ancho del nuesu territoriu, incluyendo les islles, podemos topa un ricu y variáu patrimoniu e toles époques y períodos de la nuesa hestoria. Dalgunos d’estos territorios con gran atractivu turísticu tienen una relevanca científica internacional. Un exemplu d’estos destinos son los Xeoparques, una figura de proteición beneficiada pola UNESCO nel mundu. España yá tien 11 Xeoparques, 2 d’ellos nes Isles Canaries. La estratexa desendolcada nos Xeoparques ye’l Xeoturismu, anque nestos espacios protexíos ye, ensín dulda, el meyor llugar pa paracticar el Turismu Xeolóxicu, yá que cuentan con siendes y actividaes guiaes por espertos pa poder conocer el patrimoniu xeolóxicu llocal.

Costa los Dinosaurios (Asturies)

Costa los Dinosaurios (Asturies)

Si’l Patrimoniu Xeolóxicu ye tan variáu ya interesante, ¿por qué nun tien tanta notoriedá como otra tipoloxía turística practicada nel entornu natural como, por exemplu, el Turismu Ornitolóxicu? Baxo’l mio puntu vista ye cenciello d’esplicar: el Turismu Xeolóxicu carez de bonos intérpretes de patrimoniu. Toos recordamos nel cole aquella esplicación tan dura sola Tectónica de Plaques. Esi recuerdu marcó la nuesa mocedá, y cuando nos falen de “xeoloxía”, rápidamente viennos esi recuerdu a la memoria. Esto resúmese en que nun hai bonos divulgadores de la xeoloxía, nin tampoco una firme profesionalización d’esta disciplina. En cambiu, cuando somos conscientes de consumir esti turismu, sostenible y respetuosu col nuesu entornu, yá que se trata de deprender a lleer el nuesu paisaxe, encántanos. Ye como descubrir un nuevu mundu. Ye deprender y entender el nuesu entornu. Y eso, a les persones fascínanos.

Cataratas de Pulhapanzak (Honduras). América Llatina ta apostando mui fuerte pola búsqueda de recursos turísticos rellacionaos cola cultura llocal y la naturaleza

Catarates de Pulhapanzak (Honduras).
América Llatina ta apostando mui fuerte pola búsqueda de recursos turísticos rellacionaos cola cultura llocal y la naturaleza

El Turismu Xeolóxicu debería ser una apuesta innovadora y sostenible de los territorios. Esti recursu, amás de valorizar el nuesu patrimoniu, promueve la conservación del mismu, ya incluso tien un gran potencial como recursu pedagóxicu n’Educación Ambiental. Trátase, por ello, d’un Turismu Sostenible que puede promover la creación d’empleo ente los especialistes n’Interpretación del Patrimoniu. Amás, estos grandes divulgadores tienen la capacidá de tresportarnos a una época desconocía dafechu, na que’l paisaxe, la biodiversidá, ya incluso’l clima, son mui diferentes a l’actualidá. Un viaxe nel tiempu que despierta los nuesos sentíos, maxín y creatividá. Esto si que ye un Turismu d’Esperiencies del que tanto se fala hoi día dientro del sector turísticu.

 

El Turismu Xeolóxicu debería ser una apuesta innovadora y sostenible de los territorios.

 

El Patrimoniu Etnográficu ye un gran recursu p'analizar la xeoloxía del entornu

El Patrimoniu Etnográficu ye un gran recursu p’analizar la xeoloxía del entornu

EL TURISMU ORNITOLÓXICU N’ESPAÑA

El Turismu Ornitolóxicu o Birdwatching ye una actividá que se basa nel agüeyamientu d’aves nel so entornu natural. Esta actividá tien cada día un mayor númberu de persones interesaes. El turismu ornitolóxicu n’España cuenta con un gran potencial de crecimientu.

Aves

España ye’l país con mayor biodiversidá de la Xunión Europea, contando con cuasi 600 especies de páxaros diferentes, ente les que se topen especies definíes como rareces, o incluso especies endémiques. Esto ye pola so posición bioxeográfica y a la bayura d’ecosistemes que podemos topar a lo llargo de tol territoriu nacional. N’España esisten más de 600 Zones d’Especial Proteición pa les Aves (ZEPA), lo que supon el 20% del total de la superficie del territoriu nacional, incluyendo l’espaciu terrestre y l’espaciu marín.

El turismu ornitolóxicu atrae cada vez más visitantes d’otros llugares al nuesu país, principalmente del Reinu Xuníu, Alemania y Holanda, pero tamién turistes de los Estaos Xuníos. Estímase que solo nel Reinu Xuníu hai más de 7 millones d’aficionaos a esta práctica. España recibe, aprosimadamente, 10 millones de visitantes movíos pol interés d’agüeyar dalgún tipu d’especie d’ave.

P1180751

España recibe, aprosimadamente, 10 millones de visitantes movíos pol interés d’agüeyar dalgún tipu d’especie d’ave.

Esti tipu de visitantes tan perconcienciaos cola proteición y caltenimientu de la nuesa natura, pero tamién quieren vivir esperiences úniques nos nuesos territorios. Son persones que, amás de querer agüeyar les aves, quieren descubrir l’autenticidá de los territorios, tastiar la gastronomía llocal, la etnografía, la cultura, y almirar unos paisaxes máxicos. Unos escenarios n’escelente estáu de caltenimientu que supieron conservar los habitantes de les zones rurales, pa que les aves sigan escoyendo estos espacios como’l so llugar de residencia o de pasu.

Esti tipu de turismu promueve non solo la dinamización del sector turísticu y la desestacionalización de la demanda, sinon un compromisu de les persones llocales por siguir calteniendo esti patrimoniu. Too un arguyu que persones llegaes de lloñe valoricen daqué que pa los habitantes ye tan común. Promueve valores de defensa del nuesu entornu, pero tamién de sentise arguyosos de la so tierra, del so trabayu y de la so identidá.

Al traviés d’un recursu patrimonial como son les nueses aves, podemos enseñar a los nuesos viaxeros tou un territoriu que paga la pena descubrir, nel que nun hai solo natura, sinon que tamién hai persones. Una tipoloxía de turismu que ruempe la dinámica turística estacional, y puede llegar a permitir que les persones vivan nos sos territorios durante tol añu. Un turismu que puede llegar a potenciar el sector primariu español, yá qu’esti tipu turistas tan concienciaos cola sostenibilidá, con degustar productos llocales producíos, con munchu ciñu, nel entornu. Porque’l turismu sostenible y el desarrollu rural siempre tienen que dir de la mano y enxamás estremase.

FILE89583

LA IMPORTANCIA DE SABER SEMAR PATATES

  • - ¿Sabes qué toi pensando nesti momentu?
  • - ¿En qué qué güelita?
  • - De la primera vegada que semaste les patates.
  • - ¿Y por qué t’alcuerdes d’eso agora?
  • - Pues porque toi mirando les güertes, los praos, los montes y los castañares, y ta too abandonao. Too va perdese.
  • - Nun t’entiendo.
  • - Cuando teníes 3 añiños to pa y to ma dexáronte con nós una selmana. Tábemos semando les patates y tu tabes xugando colos gatos. De sópitu, apaeciste tu na güerta diciendo que te tabes aburriendo, y que lo que tábemos faciendo que te paecía mui entretenío. Entrugástenos a to güelu y a mi si podíes echanos un gabitu. Pensábemos que dibes cansar a los 5 minutos, porque semar patates nun ye una xera mui agradable. Ye mui duro. Esplicámostelo una vegada y nun fizo falta la segunda. Tuvisti tola tardi trabayando y nun cansaste nin un segundu. Cuando pasaben los vecinos y te veíen trabayando ensín descansu, midiendo bien la distancia afayaíza ente patata y patata, sonreíen y te miraben felices. Pero nun te miraben con tantu arguyu como to güelu y como yo. La continuidá de too esto garantizábase.
  • - ¿Y por qué foi tan importante pa vosotros esi momentu?
  • - Porque yá nun hai naide que quiera venir a estes aldees tan lloñe de too. Porque yá n’aquellos tiempos veíase venir esta decadencia, y esti abandonu. Los pueblos yá nun tienen vida. Naide conoz la importancia de saber semar patates.
Paisaxe rural en peligru de desaniciu

Paisaxe rural en peligru de desaniciu

Estímase qu’en España 7 de cada 10 persones viven en zones urbanes. La búsqueda d’una bona y cómoda posición llaboral, hospitales, colexos, institutos y servicios d’ociu cercanos fae qu’estes zones seyan meyores pa la mayor parte la población española. Naide quier vivir nel escaezu. Naide quier que los sos fíos tengan que facer 20 kilómetros por unes carreteres nun estáu horrible pa dir al colexu o al institutu. Y esto, nel meyor de los casos. Porqu’hai situaciones nes qu’incluso tienen que pasar grandes puertos de montaña, con tolo qu’esto implica. Y lo mesmo si falamos de la necesidá d’acudir a un centru de salú, o al trabayu. ¿Sedría esto diferente si pudiéremos tener unos servicios básicos necesarios pa una bona y digna calidá de vida? ¿Diríen más persones a vivir a una aldea?

Esta conversación, ta sacada de la realidá, y reflexa lo importante que foi y ye la tierra pa los nuesos güelos y güeles. ¿Por qué nun lo ye pa nós? Naide quier vivir nel campu. Nun hai relevu xeneracional. Les castañares, que tanta fame quitaron nes époques más dures de la nuesa hestoria, y que tan importantes fueron pa los nuesos antepasaos, tan enfermes. Van perdese si nun les curamos a tiempu. Naide conoz les plantes melecinales, porque prefieren dir a una farmacia. Ye asina de simple. Los campos y los montes tan abandonaos dafechu, porque yá tienen quien los curie. La mayor parte de les cases tan yá colonizaes pola vexetación. Nin eso quiximos heredar.

El nuesu llegáu cultural, el patrimoniu etnográficu y los conocimientos “indíxenes” perdiéronse. Sí, nun miréis raro. Toos somos indíxenes, indíxenes del nuesu territoriu. Porque’l érminu indíxena fai referencia al nuesu orixe, y toles persones tenemos ún. Pero lo que ye más triste ye que perdimos el nuesu raigañu dafechu. Los paisanos y les paisanes tan en peligru de desaniciu.

Güerta na que s'acaben de sacar les patates

Güerta na que s’acaben de sacar les patates

Si ta too abandonao, si nun hai casi güertes o ganadería,… ¿nun nos paramos a pensar d’onde vienen los alimentos que consumimos tolos díes? Amás de que nun tenemos nin idega de lo que comemos nin la so procedencia, ye más bien el deséu de querer cambiar el mundu. Pongamos un exemplu mui simple. Si-y compramos les patates a una persona qu’apostó por vivir y trabayar nun entornu rural, amás de pone-y nome y apellíu a la nuesa comida, tamos aportando-y un beneficiu económicu a esta persona, pero tamién un beneficiu social, porque va medrar la so autoestima. Esta persona va querer siguir lluchando y trabayando por sacar alantre les sos patates y por enseñar estos conocimientos a otres perspnes. Más persones van asentase nesti o n’otros territorios. Pero nun ye solo eso. Esto va ayudar tamién a caltener los nuesos paisaxes, la nuesa natura y la nuesa biodiversidá, aspeutos de los que nos presta pola vida disfrutar cuando tenemos tiempu llibre los fines de selmana, ¿non? ¿Verdá que la comida sábenos diferente cuando tien un nome y un apellíu? Esto, xunto cola sonrisa y la felicidá cola que la comemos, aporta-y un gustu especial y únicu a esti platu.

Nun podemos imaxinar lo importante que ye consumir productos llocales. Ayudamos a que les persones que quieran quedase nel so territoriu nun lu tengan qu’abandonar, sabemos lo que comemos, fixamos población nel mediu rural, evitamos l’abandonu de los nuesos paisaxes, caltenemos el nuesu llegáu cultural, incluso contribuimos a combatir el cambiu climáticu,… ¿necesitáis más razones?

Nun ye nenguna tontá saber semar patates. Quien tien esi conocimientu tien la llicencia p’alimentar a tol territoriu. Tien la voluntá de cambiar el mundu.

Planta de patata nuna güerta resistiendo la soledá

Planta de patata nuna güerta resistiendo la soledá