Desarrollu Rural

LA REVOLUCIÓN DEL MEDIU RURAL ENTAMA NA TO NEVERA

- ¡Qué pena! Tolos pueblos tan quedando ensín xente

- Si. Tienes tola razón. ¿Y qué crees que podemos facer pa evitalo?

- Pues nun sé. Esto ye llabor de los nuesos políticos, pero como nun se pongan les piles,… mal van dir les nueses zones rurales

- Pero dalgo podremos facer, ¿non? ¿Onde faes tú la compra, por exemplu?

- Pues normalmente voi mercar al Alituerka, o nel Cincafour, pero a vegaes tamién en Mercamuyer.

- Si, tienes razón. Nun podemos facer nada pol mediu rural que nos arrodia.

“Lo más revolucionario qu’hai ye tener un güertu”. Esta afirmación que persones como Vandana Shiva o Gustavo Duch lleven años reivindicando, reflexa perbién la situación que tenemos angüaño. Tamos delantre d’un escenariu nel que la población acude, con mayor frecuencia, a grandes superficies pa facer la compra del día. Esti tipu d’empreses tan siquiera comercialicen productu llocal o de temporada, y especulen col preciu de los alimentos, dexando a los productores, munches vegaes, arruinaos o malviviendo. Yo diría más lloñe con esta reflesión: “lo más revolucionario qu’hai ye consumir productos llocales”.

Esti post entamaba con una “hipotética conversación”, pero cada día más real y habitual. Siempre lleemos na prensa, reportaxes, documentales o nes nueses redes sociales, noticies sola agonía del mediu rural español. Los nuesos políticos siempre tan llanzando midíes pa da-y un puxu al sistema campesín español, anque siempre por mediu de sovenciones, y otru tipu aiciones que siguen esa mesma filosofía, y pa les que tan siquier contaron o s’aconceyaron cola población afectada. A mí prestaríame facer llabor d’investigación na nevera d’un representante políticu, sobre too, los que trabayen en mediuambiente y/o desarrollu rural. Deberíen ser les primeres persones en dar exemplu, n’echar un gabitu a los pequeños empresarios agroalimentarios pa que puedan vivir y trabayar nel so territoriu, asina como de la so profesión, porque los nuesos ganaderos, agricultores, abeyeros, queseros,…etc., son los auténticos caltenedores del paisaxe. La nevera o la despensa ye l’arma que tenemos toles persones pa facer la revolución. La nevera ye la ferramienta que podemos utiliar pa que pueda espoxigar el mediu rural.

La nevera o la despensa ye l’arma que tenemos toles persones pa facer la revolución. La nevera ye la ferramienta que podemos utiliar pa que pueda espoxigar el mediu rural.

¿Dalguna vegada te paraste a güeyar l’orixe de los alimentos? Últimamente ta mui de moda analizar si los productos que tamos consumiendo tienen aceite de palma, o otros ingredientes que nun favorecen a la nuesa salú. Esta técnica ta mui bien, yá que ye perimportante qu’entamemos a tar concienciaos so esta problemática perxudicial pa la salú y el mediuambiente, pero hai otres variables que son igual de graves. Por exemplu, mercamos pescáu, carne o frutes que vienen d’América o Asia, que lleguen al nuesu supermercáu al traviés de dellos intermediarios, y que tan mercaos al productor a precios mui baxos. Nun tenemos nengún tipu de garantía de calidá, nin seguridá alimentaria so estos productos. Nun tenemos nengún conocimientu sol procesu de producción, o los agrotósicos que s’utilizaron a lo llargo del so ciclu productivu, o pal so caltenimientu. Nel meyor de los casos, suponiendo qu’esi productu tien un sellu o certificáu ecolóxicu, ¿nun vamos pensar na güelga de carbonu que xeneró esi productu hasta llegar a la nuesa nevera? Ye como si esos detallinos fueren coses que nun nos esmolecen, y que val más nun pensar nello, o que nun nos paez que tenga importancia.

Si, amigxs, comprar productos direutamente al productor, o en tiendes de cercanía, de confianza, y qu’apuesten pol comerciu llocal ye un actu revolucionariu. Non necesariamente ye pagar más por un productu, nin tampoco ye evitar intermediarios p’aforrar perres, sinon que ye apostar y confiar en que’l productor tenga un preciu xustu, y que consiga una dignidá llaboral. Ye apostar por fixar población nel mediu rural y fomentar la producción de variedaes y races autóctones que s’alcuentren en peligru de desaniciu, y que, al mesmu tiempu, estes actividaes agroganaderes, beneficien a los ecosistemes, a los paisaxes, a la biodiversidá y a les persones que caltienen y conserven les nueses aldees. Dende un puntu vista egoísta del ser humanu, ye poder disfrutar de territorios vivos y curiaos nel nuesu tiempu llibre. Pero trátase tamién de saber lo que compramos y lo que comemos, de tener una seguridá alimentaria que mos certifique que nun tamos envelenándonos a nós mesmos, nin que tamos perxudicando’l planeta nel que vivimos, y que queremos dexar pa les xeneraciones venideres. Esti ye ún de los actos d’amor incondicional más noble, y de respetu al nuesu entornu más cercanu. Tamos impulsando una cadena de bona voluntá qu’entama nes nueses cases, onde les nueses neveres y despenses recuérdennos que gracies a les nueses pequeñes aiciones podemos llegar a facer grandes coses.

Tamos impulsando una cadena de bona voluntá qu’entama nes nueses cases, onde les nueses neveres y despenses recuérdennos que gracies a les nueses pequeñes aiciones podemos llegar a facer grandes coses.

IMG_3165

EMPRENDIMIENTU Y TRESFORMACIÓN SOCIAL

Anguaño vivimos un períodu llaboral confusu, nel que la solución pa tener un trabayu remuneráu paez que pasa pol autoempléu. Nos últimos tiempos, les pallabres emprendedor/a y/o emprendimientu paecen tar de moda, ye dicir, l’aniciu d’un negociu, baxo la forma xurídica que seya. Pero, recientemente, esto dio un xiru de 180º, yá que cada vegada más persones opten por emprender una actividá, al mesmu tiempu que xeneren beneficios sociales y/o meyores ambientales nel so entornu direutu. Hai poco preguntábenme: “¿Cómo te ves nun futuru nel to trabayu?” La mio rempuesta foi contundente, y ensín necesidá de pensar demasiao, quiciabes d’una manera utópica, pero convencía d’ello, respondí: “Tresformando’l mundu”.

Hai poco preguntábenme: “¿Cómo te ves nun futuru nel to trabayu?” La mio rempuesta foi contundente, y ensín necesidá de pensar demasiao, quiciabes d’una manera utópica, pero convencía d’ello, respondí: “Tresformando’l mundu”.

Cada vegada hai un mayor númberu d’empreses que quieren ser sostenibles, y esto solo va algamase trabayando d’un mou direutu coles persones: clientes, sociedá, entornu, empleaos o proveedores, ente otros. Porque, al final, les empreses que lluchen por un cambiu social son empreses sostenibles, entendiendo esto como la triple cuenta de resultaos: económica, social y ambiental. ¿Qué queremos les persones que nos dedicamos al llamáu “emprendimientu social o sostenible”? Pues que gracies a los nuesos servicios, productos, actividaes,…etc., tengamos la posibilidá de tener un entornu más xustu ya igualitariu, nel qu’esistan oportunidaes pa tol mundu, integrando a tolos colectivos sociales, pero tamién impulsando midíes que promuevan la proteición ambiental y la llucha escontra’l cambiu climáticu.

Mui guapo y mui utópico, pero, ¿esto ye real o yes una ONGD? Si, esto ye real, y nin yo, nin nenguna de les persones que trabayen n’emprendimientu social somos ONGD’s. Anque hai que reconocer que ye muncho más duro entamar un negociu d’estes carauterístiques que cualisquier otru, porque pa entamar, toles persones qu’integren l’equipu debemos tener sueldos dignos, o un repartu equitativu de les ganancies. Si esto nun se cumple, entós nun ye una empresa sostenible, nin muncho menos quier promover un cambiu social. Tampoco voi pidir perdón por querer ganame la vida, ye dicir, faigo servicios de consultoría ambiental, de turismu sostenible, asistencies técniques de desarrollu rural, educación ambiental,…etc., servicios que, pa determinaes persones o colectivos, deberíen ser de baldre. Pues bien, NON. Ye’l mio trabayu. El tiempu qu’invierto en preparar les actividaes, en visitar los territorios, n’investigar estratexes que favorezan el desendolcu sociu-económicu d’un territoriu,…etc. Too esto lleva munchu esfuerzu, xera y conocimientu, y toles persones necesitamos dineru pa vivir. Que yo decidiera llevar a la práctica nel mio trabayu una filosofía de vida nun quier dicir que tenga que facelo de baldre.

¡Qué sí, qué sí! Qu’esto ye perguapo, pero pon exemplos prácticos. Pues imaxina una empresa d’alimentación que decide pagar el preciu xustu a los sos proveedores, apostar pola venta de productos Km0 y/o ecolóxicos y evistar l’usu de bolses de plásticu ente los sos clientes. O una empresa que forme y trabaye con muyeres con dificultaes d’accesu al mercáu llaboral (pol motivu que seya), o persones con discapacidá. Ensín qu’esto condicione’l llevase ayudes y/o sovenciones públiques que favorezan estes contrataciones. Pongamos el casu d’una empresa d’apicultura que solo venda’l miel que produz (a ser posible nun entornu cercanu), ensín echar pesticides o fertilizantes, preocupándose pola biodiversidá llocal y pola restauración d’elementos patrimoniales. O, per otru llau, empreses qu’aprovechen la recoyía, llimpieza y tresformación de residuos, aceite usáu, pa xenerar subproductos y dar una segunda oportunidá a estos restos que terminaríen enterraos o incineraos…etc. Por últimu, una axencia de viaxes que promueva práctiques ambientales y sociales responsables ente los sos clientes, con actividaes comprometíes col territoriu visitáu y pagando precios xustos a los sos collaboradores. Toos estos exemplos, y munchos más, esisten, son reales y rentables, y podrían esplicase con munchísimu más detalle caúna de les esperiencies descrites.

L’emprendimientu social o sostenible ye una doble oportunidá. Per un llau tamos xenerando un beneficiu económicu, non sólo a nós mesmos, sinon a los nuesos empleaos, collaboradores, proveedores,…etc., Per otru, lluchamos por meyorar los nuesos entornos. Trabayamos pa cambiar el mundu. Lo único que pedimos ye que se favoreza la esistencia de polítques públiques qu’echen un sofitu a esti tipu organizaciones, non solo con accesu a fuentes de financiación, sinon con visibilidá, con centros d’asesoramientu públicu gratuitos, con información o con incentivos pa entidaes que promuevan el bientar social y ambiental de la población. Simplemente, que nun nos pongan problemes a la hora d’entamar una actividá llaboral qu’implique fines sostenibles.

 

Lo único que pedimos ye que se favoreza la esistencia de polítques públiques qu’echen un sofitu a esti tipu organizaciones, non solo con accesu a fuentes de financiación, sinon con visibilidá, con centros d’asesoramientu públicu gratuitos, con información o con incentivos pa entidaes que promuevan el bientar social y ambiental de la población. Simplemente, que nun nos pongan problemes a la hora d’entamar una actividá llaboral qu’implique fines sostenibles.

LA IMPORTANCIA DE SABER SEMAR PATATES

  • - ¿Sabes qué toi pensando nesti momentu?
  • - ¿En qué qué güelita?
  • - De la primera vegada que semaste les patates.
  • - ¿Y por qué t’alcuerdes d’eso agora?
  • - Pues porque toi mirando les güertes, los praos, los montes y los castañares, y ta too abandonao. Too va perdese.
  • - Nun t’entiendo.
  • - Cuando teníes 3 añiños to pa y to ma dexáronte con nós una selmana. Tábemos semando les patates y tu tabes xugando colos gatos. De sópitu, apaeciste tu na güerta diciendo que te tabes aburriendo, y que lo que tábemos faciendo que te paecía mui entretenío. Entrugástenos a to güelu y a mi si podíes echanos un gabitu. Pensábemos que dibes cansar a los 5 minutos, porque semar patates nun ye una xera mui agradable. Ye mui duro. Esplicámostelo una vegada y nun fizo falta la segunda. Tuvisti tola tardi trabayando y nun cansaste nin un segundu. Cuando pasaben los vecinos y te veíen trabayando ensín descansu, midiendo bien la distancia afayaíza ente patata y patata, sonreíen y te miraben felices. Pero nun te miraben con tantu arguyu como to güelu y como yo. La continuidá de too esto garantizábase.
  • - ¿Y por qué foi tan importante pa vosotros esi momentu?
  • - Porque yá nun hai naide que quiera venir a estes aldees tan lloñe de too. Porque yá n’aquellos tiempos veíase venir esta decadencia, y esti abandonu. Los pueblos yá nun tienen vida. Naide conoz la importancia de saber semar patates.
Paisaxe rural en peligru de desaniciu

Paisaxe rural en peligru de desaniciu

Estímase qu’en España 7 de cada 10 persones viven en zones urbanes. La búsqueda d’una bona y cómoda posición llaboral, hospitales, colexos, institutos y servicios d’ociu cercanos fae qu’estes zones seyan meyores pa la mayor parte la población española. Naide quier vivir nel escaezu. Naide quier que los sos fíos tengan que facer 20 kilómetros por unes carreteres nun estáu horrible pa dir al colexu o al institutu. Y esto, nel meyor de los casos. Porqu’hai situaciones nes qu’incluso tienen que pasar grandes puertos de montaña, con tolo qu’esto implica. Y lo mesmo si falamos de la necesidá d’acudir a un centru de salú, o al trabayu. ¿Sedría esto diferente si pudiéremos tener unos servicios básicos necesarios pa una bona y digna calidá de vida? ¿Diríen más persones a vivir a una aldea?

Esta conversación, ta sacada de la realidá, y reflexa lo importante que foi y ye la tierra pa los nuesos güelos y güeles. ¿Por qué nun lo ye pa nós? Naide quier vivir nel campu. Nun hai relevu xeneracional. Les castañares, que tanta fame quitaron nes époques más dures de la nuesa hestoria, y que tan importantes fueron pa los nuesos antepasaos, tan enfermes. Van perdese si nun les curamos a tiempu. Naide conoz les plantes melecinales, porque prefieren dir a una farmacia. Ye asina de simple. Los campos y los montes tan abandonaos dafechu, porque yá tienen quien los curie. La mayor parte de les cases tan yá colonizaes pola vexetación. Nin eso quiximos heredar.

El nuesu llegáu cultural, el patrimoniu etnográficu y los conocimientos “indíxenes” perdiéronse. Sí, nun miréis raro. Toos somos indíxenes, indíxenes del nuesu territoriu. Porque’l érminu indíxena fai referencia al nuesu orixe, y toles persones tenemos ún. Pero lo que ye más triste ye que perdimos el nuesu raigañu dafechu. Los paisanos y les paisanes tan en peligru de desaniciu.

Güerta na que s'acaben de sacar les patates

Güerta na que s’acaben de sacar les patates

Si ta too abandonao, si nun hai casi güertes o ganadería,… ¿nun nos paramos a pensar d’onde vienen los alimentos que consumimos tolos díes? Amás de que nun tenemos nin idega de lo que comemos nin la so procedencia, ye más bien el deséu de querer cambiar el mundu. Pongamos un exemplu mui simple. Si-y compramos les patates a una persona qu’apostó por vivir y trabayar nun entornu rural, amás de pone-y nome y apellíu a la nuesa comida, tamos aportando-y un beneficiu económicu a esta persona, pero tamién un beneficiu social, porque va medrar la so autoestima. Esta persona va querer siguir lluchando y trabayando por sacar alantre les sos patates y por enseñar estos conocimientos a otres perspnes. Más persones van asentase nesti o n’otros territorios. Pero nun ye solo eso. Esto va ayudar tamién a caltener los nuesos paisaxes, la nuesa natura y la nuesa biodiversidá, aspeutos de los que nos presta pola vida disfrutar cuando tenemos tiempu llibre los fines de selmana, ¿non? ¿Verdá que la comida sábenos diferente cuando tien un nome y un apellíu? Esto, xunto cola sonrisa y la felicidá cola que la comemos, aporta-y un gustu especial y únicu a esti platu.

Nun podemos imaxinar lo importante que ye consumir productos llocales. Ayudamos a que les persones que quieran quedase nel so territoriu nun lu tengan qu’abandonar, sabemos lo que comemos, fixamos población nel mediu rural, evitamos l’abandonu de los nuesos paisaxes, caltenemos el nuesu llegáu cultural, incluso contribuimos a combatir el cambiu climáticu,… ¿necesitáis más razones?

Nun ye nenguna tontá saber semar patates. Quien tien esi conocimientu tien la llicencia p’alimentar a tol territoriu. Tien la voluntá de cambiar el mundu.

Planta de patata nuna güerta resistiendo la soledá

Planta de patata nuna güerta resistiendo la soledá

L'ORIXE DE LOS PASTOS DEL PARQUE NACIONAL PICOS D'EUROPA

Cualisquier paisaxe puede mostrase diferente a los güeyos de cada persona. Unes persones fíxense más nes flores, otres nes biesques, otres nes piedres o los fósiles, otres nel modeláu glaciar, y otras nes güelgues y señes que dexaron sol paisaxe los seres humanos que vivieron nun territoriu a lo llargo la so hestoria. El paisaxe ye un llibru con bayurosos capítulos, y caún d’ellos tien la so respectiva interpretación: un capítulu ta dedicáu a la botánica, otru a la fauna, tamién la xeoloxía tien la so parte importante nel llibru,… Auque esistan munchos capítulos escritos nel paisaxe, con diferentes y múltiples temátiques, toos ellos tienen rellación coles persones, siendo esti’l capítulu más importante y más estensu que se escribiera nel paisaxe, nel territoriu. Un capítulu que nun va terminar enxamás d’escribise, que sigue vivu, y qu’esperemos que nunca tenga un final.

Vaques na redolada del Llagu Ercina

Vaques na redolada del Llagu Ercina

Esti ye’l primer artículu dedicáu a la interpretación del patrimoniu y a lleer el paisaxe, con enfotu a la estrecha rellación ente los seres humanos y la natura. Nesti casu queremos falar sola importancia de la xeoloxía pa la vida de les persones, pa la vida de los pastores de los Picos d’Europa. Porque les persones y la natura necesítense mutuamente. Queremos, amás, que seya un homenaxe enllenu de ciñu, pa dalgunos quiciabes un poco raru, a los ganaderos de Picos d’Europa.

¿Dalguna vegada vos preguntareis por qué’l Parque Nacional Picos d’Europa ye tan importante y favorable pa la ganadería? La xeoloxía tien un papel perimportante y básicu nello. Esti artículu, ensín ánimu d’entrar en términos técnicos o científicos, va facer un resume de más de 500 millones d’años d’hestoria xeolóxica del Parque Nacional, una hestoria cola que, en munchos casos ensín percatase, conviven los ganaderos de Picos d’Europa.

Les roques tamién son perimportantes pa les aves, yá que ye'l llugar qu'escueyen munches especies pa poner el nial

Les roques tamién son perimportantes pa les aves, yá que ye’l llugar qu’escueyen munches especies pa poner el nial

Son dellos los procesos que lleven a qu’estes montañes, en particular, y al Cordal Cantábricu, en xeneral, tengan la configuración que tienen anguaño. La hestoria xeolóxica del Parque Nacional ye llarga y complexa, y remóntase a más de 500 millones d’años, cuando nun había montañes, cuando too yera un ambiente costeru, más típicu de climes tropicales, siendo estes les roques más vieyes que formen el Parque Nacional. A lo llargo de más de mediu millón d’años, como consecuencia del desplazamientu de les plaques tectóniques, los cambeos de latitú, asina como los procesos de deformación que sufrieron les roques d’esti territoriu, y ensín escaecenos de los cambeos nel nivel de la mar, el sedimentu (que col pasu los años forma les roques) foi acumulándose n’ambientes mui diferentes ente sí: dende mares profundos, a mares más cerquina la costa, deltes o ríos. Anque, ensín dulda, la roca caliar del Carboníferu, la que domina en Picos d’Europa y los cumales más importantes, indiquen qu’esti territoriu tuvo baxo’l mar durante munchos millones d’años.

Fotografía realizada desde la cima del Cotalba

Semeya fecha dende’l cumal del Cotalba

Otru de los episodios xeolóxicos que más “personalidá” donó al Parque Nacional foi la oroxenia Alpina. Etapa na que les roques que se depositaron nesti tiempu, se llevanten pa formar el Cordal Cantábricu. Esti procesu entamó hai, aprosimadamente, 50 millones d’años, y les sos consecuencies fueron la formación de los montes, colos sos desniveles y altor, amaos por montañeros y senderistes, y onde les vaques, cabres y oveyes s’alimenten, siempre vixilantes por pastores, persones que trabayen nes más dures condiciones.

Un de los episodios xeolóxicos que más “personalidá” dió al Parque Nacional foi la oroxenia Alpina. Etapa na que les roques que se depositaron nesti tiempu, se llevanten pa formar el Cordal Cantábricu.

Semeya fecha dende'l H.ultayu

Semeya fecha dende’l H.ultayu

Una vegada que se forma’l Cordal Cantábricu, pa tener la forma que tien anguaño, influyen dellos factores, como’l tipu roques qu’hai, l’aire, l’agua o los cambeos nel clima, ente otros. Como exemplu d’influencia climática, los fenómenos glaciares entamaron hai, aprosimadamente, 100.000 años, y tuvieron importancia na forma del paisaxe, dexándonos llagos, valles o circos glaciares, ente otros, que dan forma a un paisaxe d’ensueñu.

Fenómeno de glaciarismo en el entorno de los Lagos de Covadonga

Fenómenu de glaciarismo nos Llagos de Cuadonga

Tampoco vamos escaecenos la aición de los ríos, resultáu del poder erosivu del agua sola roca caliar. El Parque Nacional asítiase dientro les cuenques hidrográfiques de los ríos Sella, Deva y Cares. De fechu, el ríu Sella y el ríu Deva marquen los llímites occidental y oriental, respeutivamente, del Parque Nacional. Amás, el ríu Cares y el Duje, afluente del Cares, separten esti territoriu en tres macizos: Occidental o del Cornión, Central o de Los Urrieles y Oriental d’Andara. Esta importante dinámica fluvial dió como resultáu los más impresionantes desfiladeros o cañones, como Los Beyos o El Cares.

El Ríu Cares

El Ríu Cares

Si hai un procesu perimportante pal ganáu, esi ye’l procesu de disolución de la roca caliar, la karstificación.

Si hai un procesu perimportante pal ganáu, esi ye’l procesu de disolución de la roca caliar, la karstificación. Esti procesu ye la consecuencia de l’acición del agua, lo que fixó que’l Parque Nacional seya un de los sistemes kársticos con mayor fama ya importancia mundial. Esti procesu manifiéstase en superficie por formes como fisures nes roques, depresiones (llamaes dolines o h.ous), “poljés” o valles ciegos. La roca caliar ta formada por carbonatu cálcicu, pero amás contienen materiales insolubles o “impureces”, como les arcilles, polo que al disolvese la roca caliar xenera arcilles de decalcificación que s’acumulen sola roca caliar. Esto aporta unos nutrientes de calter escepcional, ye dicir, la base pa los pastos de Picos d’Europa, onde guarez el ganáu, debe la so importancia al procesu de disolución de la roca caliar. Anque esti procesu, de xuru que ye tamién el causante de les bayuroses pérdides nes cabeces de ganáu, yá que puen cayer al traviés de los h.ous que conecten coles cueves soterrañees. Asturies, en xeneral, y Picos d’Europa, en particular, ye como un quesu gruyère, yá que nel so interior guarda grandes ayalgues, que sólo los espeleólogos más temerarios descubrieron, siendo esti territoriu consideráu como l’Himalaya de los espeleólogos. Dalgunes de les sos principales simes tópense ente les más profundes del mundu.

Poljé de Comeya

Poljé de Vega de Comeya

Los Picos de Europa considérense como l’Himalaya de los espeleólogos. Dalgunes de les sos principales simes tópense ente les más profundes del mundu.

Como acabamos de ver, too esti complexu territoriu ye’l paisaxe que almiren tolos díes los nuesos paisanos y paisanes, el so hogar, el so centru de trabayu, un entornu que curien y respeten, un paisaxe nel qu’ellos y elles escribieron. La xeoloxía tuvo munchu pesu nesta hestoria, na so hestoria. Porque la xeoloxía ye perimportante pa estes persones, yá qu’amás de xenerar el pastu nel que guarez el ganáu, los cumales a los que tienen que s’enfrentar pa desendolcar el so noble trabayu, tamién-yos aporta los recursos necesarios pa construyir les sos cabañes y mayaes. Debemos protexer esti trabayu en peligru de desaniciu, el pastoréu de Picos d’Europa, pero tamién debemos protexer, conservar y caltener el nuesu entornu, el nuesu hogar, porque los paisaxes qu’almiramos son el resultáu de millones d’años de trabayu de la natura, y nun los debemos echar a perder pola nuesa incomprensión ya idees enquivocaes.

Güe pastiando nos Llagos de Cuadonga, onde podemos ver los impresionantes desniveles del territoriu, los valles y circos glaciares, y tamién los fenómenos de disolución de la roca caliar

Güe pastiando nos Llagos de Cuadonga, onde podemos ver los impresionantes desniveles del territoriu, los valles y circos glaciares, y tamién los fenómenos de disolución de la roca caliar

Debemos protexer esti trabayu en peligru de desaniciu, el pastoréu de Picos d’Europa, pero tamién debemos protexer, conservar y caltener el nuesu entornu, el nuesu hogar, porque los paisaxes qu’almiramos son el resultáu de millones d’años de trabayu de la natura, y nun los debemos echar a perder pola nuesa incomprensión ya idees enquivocaes.

 

L'ECOTURISMU N'ESPAÑA

Nos caberos años dientro’l sector turísticu ta falándose muncho sol Ecoturismu, pero,… ¿sabemos qué ye realmente l’Ecoturismu? ¿Ye l’Ecoturismu sinónimu de Turismu de Naturaleza? ¿Tamos aplicando bien esi términu? Nesti post vamos resolver delles duldes sola pallabra ecoturismu, y siempre dende la opinión de les persones que formamos l’equipu de Lláscara.

L’Ecoturismu ye “El viaxe responsable a les árees naturales pa conservar el mediu ambiente y meyorar el bientar de les persones llocales”

“The International Ecotourism Society” define l’Ecoturismu como “El viaxe responsable a les árees naturales pa conservar el mediu ambiente y meyorar el bientar de les persones llocales”. Esto quier dicir que los axentes, xestores y empreses que desendolquen y promocionen actividaes d’ecoturismu y les persones que participen nes mesmes, deberíen de siguir una serie de principios, ente los que se topen:

  • Amenorgar los impactos ambientales y sociales
  • Aumentar la conciencia y el respetu de la población llocal y el visitante pol mediu ambiente y la cultura llocal
  • Ufiertar esperiencies positives tanto pa los visitantes, como les poblaciones que tan dientro los espacios que se visiten
  • Ufiertar beneficios económicos directos pa la conservación
  • Promover el desendolcu económicu y social de los territorios que se visiten

Na mayoría los casos, l’Ecoturismu confúndese col Turismu de Naturaleza, y polo que podemos ver na definición, Ecoturismu NUN YE LO MESMO que Turismu de Naturaleza, el cual defínese como cualisquier actividá deseldolcada en contactu cola naturaleza. Entós, ¿por qué tamos condundiéndolo?

Ecoturismu nun ye lo mesmo que Turismu de Naturaleza

Durante esti últimu añu, formáronse bayuroses iniciatives “mal llamaes Ecoturismu”, baxo’l nuesu puntu vista. Pero, ¿por qué dicimos eso de “mal llamaes”? Pa que una iniciativa seya talamente Ecoturismu la primera clave que consideramos fundamental ye involucrar a la población rural nes nueses actividaes, qu’eses persones que viven y trabayen nos territorios campesinos tean realmente reconocíes y valoraes gracies a estes iniciatives, y, por supuesto, que xeneren beneficios económicos directos de les mesmes. Nun sirve de nada llevar a un grupu de persones a una zona rural, y tan siquiera fala-yos d’un productu típicu, que visiten a un artesanu, agricultor o ganaderu, y que tastien los sos productos, y qu’incluso puedan mercalos. D’esta manera, la población llocal nun solo va aumentar la so autoestima, sinon que tamién van ver incrementaos los sos ingresos y reconocíu’l so valor.

Vaques nel Puertu de la Montaña de Cuadonga

Vaques nel Puertu de la Montaña de Cuadonga

Ye perimportante involucrar a la población rural nes nueses actividaes, qu’eses persones que viven y trabayen nos territorios campesinos tean realmente reconocíes y valoraes gracies a estes iniciatives, y, por supuesto, que xeneren beneficios económicos directos de les mesmes.

En segundu llugar, y non por ello menos importante, un turismu de calidá nun debe consentir grupos de munches persones nes zones rurales o árees naturales. Por un llau, porque nun solo vamos molestar a la población rural qu’ellí vive, y quienes enxamás-yos entrugamos la so opinión na xestión turística, sinon que tamién producimos impactos nel entornu, principalmente a la flora y fauna, y por fauna falamos también de los impactos que se xenera sola actividá ganadera esti turismu de mases insostenible dafechu, non solo a la fauna xabaz. ¿Prestaríanos tener peles nueses cais o centros de trabayu grupos de 20-30 o más persones, paseando, falando y tirando basoria (nel peor de los casos) tolos díes? De xuru que la rempuesta ye un non. Y nun val dicir que nun ye’l nuesu problema, o dicir eso de “yá, pero sólo ye un día”. Porque si, pue que nós colos nuesos grupos solo vaigamos un día a una determinada zona, pero al día siguiente dirá otru grupu, pasáu otru,…, y asina cada día.

Cabres na carretera del Parque Natural de Ponga

Cabres na carretera del Parque Natural de Ponga

Últimamente, pueden vese dalgunos proyectos d’Ecoturismu, que surden pa promocionar territorios que nun reciben les visites qu’esperen recibir (a vegaes preguntámonos cuál ye’l númberu de visites ideal que consideren los xestores turísticos, porque como suel dicise “nunca ta la cesta onde presta”). Pa ello, promociónense eventos como’l “Día de la Red Natura 2000”, el “Día del Mediu Ambiente”, o cualisquier otru eventu asemeyáu, llevando grupos de más de 30 persones a un Espaciu Natural Protexíu, pero,… ¿incrementen esti tipu d’eventos los beneficios sociales y económicos de la población rural? ¿Sabemos realmente qué ye la Red Natura 2000? ¿Nun esiste la Red Natura 2000 tol añu o sólo’l 21 de Mayu? ¿Y qué pasa’l restu l’añu? O más cenciello, ¿Sabemos qué ye’l mediu ambiente o el desarrollu rural? Paez que l’ecoturismu o el Turismu de Naturaleza solo sólo pa díes especiales y el restu l’añu podemos promocionar Turismu de Ñeve o Turismu Cinexéticu, baxo’l nuesu puntu vista, incompatible con un turismu responsable y sostenible. Quiciabes por un desconocimientu, pero paez que l’ecoturismu ye otru nome que caló na población pa promocionar territorios o comarques, ensín tener en cuenta a la población residente y les sos actividaes económiques, pero que les coses van siguir faciéndose de la mesma manera, pero con otru nome creativu ya innovador. Por ello, ye mui necesaria la formación y la sensibilización pa qu’esti tipu coses nun socedan. A vegaes, simplemente ye desconocimientu.

Paez qu’esti ye un mensaxe un poco negativu, pero esisten pequeñes iniciatives a nivel nacional que mos dan esperanza y sofitu al restu persones de qu’otru modelu turísticu ye posible. Porque sólo se necesiten ganes de facer bien les coses, ilusión y pasión pol trabayu, pa qu’asina puedan cambiar les coses.

El prósimu añu 2017 sedrá l’Añu Internacional del Turismu Sostenible, quiciabes pueda ser un bon momentu pal cambiu.

Vaques nel el Macizu d'Ubiña

Vaques nel el Macizu d’Ubiña

 

LLÁSCARA: ESPERIENCIA EXEMPLAR DE LA FUNDACIÓN FÉLIX RODRÍGUEZ DE LA FUENTE

Lláscara, Experiencia Ejemplar de la Fundación Félix Rodríguez de la Fuente

Lláscara, Experiencia Ejemplar de la Fundación Félix Rodríguez de la Fuente

Foi hai dos años cuando la Fundación Félix Rodríguez de la Fuente, al traviés del programa CoEmprender contautó conmigo pa formar parte d’esti proyectu qu’entamaría en xineru de 2014. Esti proyectu taba basáu nel asesoramientu mutuu, la solidaridá y la coopoeración ente la entidá exemplar nel mediu rural y el profesional emprendedor en desempléu, que se desplaza a la entidá. El programa taba destináu a promover y crear nuevos proyectos sostenibles nel mediu rural natural nel estáu español y a establecer llazos llaborales ente los participantes. N’aquella época, yo yera la emprendedora en situación de desempléu, y los mios amigxs Chema y Belén, de la empresa Itinerantur, la empresa cola que yo diba collaborar. Grandes persones con quienes tengo una gran amistá anguaño, y a los que taré siempre agradecida por meteme en so casa y por dame la oportunidá de deprender d’Itinerantur. Fuimos los primeros en firmar esti programa, lo que mos sirvió pa salir en dalgún periódicu qu’otru.

tumblr_inline_n02afoYFBA1rhwwzc

Dos años más tarde, tras munchu esfuerzu y dures xornaes de trabayu, la Fundación Félix Rodríguez de la Fuente, al travíes del programa “Esperiencies exemplares”, nomó a Lláscara Esperiencia Exemplar. ¡Nun hai pallabres que describan la felicidá que siento agora mesmo.

Pincha nesti enllaz pa más información

Sigún la Fundación Félix Rodríguez de la Fuente “les esperiencies exemplares son iniciatives del territoriu que son paradigma de la converxencia, lideraes por persones o instituciones comprometíes cola conservación de la naturaleza y la supervivencia del mundu rural. Estes esperiencies constituyen exemplos riales que demuestren la viabilidá que tien esta forma d’afrontar la relación ente l’Home y la Tierra en beneficiu de la biodiversidá y el mundu rural”.

¡Gracies a toles persones que durante esti primer añu de trabayu ficieron posible esti reconocimientu! Vosotros y vosotres sois los únicos responsables d’ello, y por supuesto gracies a la Fundación Félix Rodríguez de la Fuente, porque dende qu’entamé la mio esperiencia d’autoempléu, siempre tuvieron ehí dándome’l so sofitu, y lo que pa mi ye más importante, dando visibilidá a proyectos exemplares nel mediu rural, y lluchando pa qu’estos territorios sigan vivos, yá que les persones que viven y trabayen nestes zones son los garantes de la conservación de la biodiversidá y cuidadores de los nuesos paisaxes. Ye un honor pa Lláscara tar dientro d’esti programa, por tolo que representa y lo que significa.

¡Gracies! Y que l’añu 2016 nos traiga más esperiencies auténtiques nel mediu rural asturianu!

EL CASTRU SAN CHUIS: PATRIMONIU CULTURAL ABANDONÁU

El Castru San Chuis ta llocalizáu nel altu San Chuis, a 6,5 Km de La Puela Allande, y foi reconocíu como’l núcleu castreñu más importante de la comarca pola so ubicación.

Castro San Chuis

Esti castru ta asentáu nun promontoriu rodeáu por un gran fosu al Oeste que delimita l’antecastru, protexíu por cinco fosos y contrafosos. Na zona Este y Oeste, tovía puede observase una parte de la so muralla, construida pol sistema de módulos rectangulares d’esquines redondeaes adosaes.

Castro San Chuis

Trátase d’un castru ocupáu por comunidaes indíxenes, en primer llugar, que s’entamó nel sieglu VIII d.C., en plena Edá del Fierru, y depués una ocupación romana, cuya presencia manifiéstase nel sieglu I d.C. Ye mui posible que seya un castru vinculáu a les esplotaciones romanes d’oru. Dende’l castru podemos almirar nes montañes del entorno les abundantes mines d’oru qu’había na época. Les escavaciones del castru entamaron nos años 60 del sieglu pasáu, y créese que solamente ta escaváu’l 30% del total.

Castro San Chuis

Hai dos sectores bien diferenciaos. El sector inferior ta formáu por cabanes de planta circular con muros de pizarra tabular dimpuestes sigún les característiques xenerales del urbanismu castreñu. El sector superior muestra cabanes con ángulos rectos y con muros medianeros, alineaes con varies dependencies regulares. Destaca la pavimentación de les calles con lloses de pizarra. Nes llabores d’escavación recuperáronse oxetos como cerámica, un conductu cubiertu pa evacuar agües y una escultura d’un rostru humanu.

Castro San Chuis

Esti domingu 16 d’agostu decidí facer una ruta pela zona d’Allande, un conceyu mui guapu y con altos valores naturales, culturales y turísticos. Facía dos años que nun visitaba’l castru y lo que me topé foi un estáu llamentable de la conservación del castru, mui triste. ¿Cómo ye posible qu’un símbolu tan importante del nuestru patrimoniu cultural, declaráu Bien d’Interés Cultural tea nun estáu d’abandonu total? ¿Tan poco ciñu tenemos pola nuesa historia y pola nuesa cultura?

Castro San Chuis

Les semeyes muestren muros que yá cayeron, y otros que tan a puntu facelo, cabanes llenes de felechos, un campu enllenu de uces, artos, y cotoyes, la yerba ensín segar, bidules medrando ente la muralla y les muries de les cabanes, que’l so raigañu terminará por tirar parte de les muries, y con ello, acabará un parte importante del nuesu patrimoniu.

Castro San Chuis

Llámame tamién l’atención, y pregúntome, cómo puede ser posible qu’un llugar tan impresionante, con tanta hestoria, con un altu valor patrimonial y gran atractivu turísticu nun seya visitáu y nun tenga un programa de visites guiaes. Durante les 4 hores que tuvimos ellí visitando y fotografiando’l castru sólo vimos dos persones, un domingu d’agostu, en plenu puente festivu nacional. Cabe destacar que los accesos al castru tan mui mal cuidaos, y que de xuru que cuando entamen les lluvies, tarán muncho peor, y la señalización pa llegar dende la AS-14 ye mui probe.

Castro San Chuis

Dende equí reinvindico que, por favor, se faigan llabores de mantenimientu nel castru, yá que la vexetación terminará por facer que muerra’l yacimientu arqueolóxicu. Creo que tamién ye necesario una bona panelización pa facer una visita autoguiada del castru dende Samartín de Beduléu. Un paséu preciosu y interesante pa interpretar non solo’l castru, sinon tola zona, el paisaxe rural, la Biesca, la minería del oru y, por supuesto, el castru. Sedría maravilloso p’Allande poner la comarca nel mapa, que les persones disfruten del entornu y que marchen del nuesu territoriu contentos y felices. Otra posibilidá ye habilitar guíes llocales pa que los visitantes puedan facer una visitada guiada de calidá y, con ello, la creación y consolidación d’empléu na zona.

Castro San Chuis

Ye’l nuesu patrimoniu, si lu abandonamos tamos perdiendo una parte fundamental de la nuesa hestoria, tamos destruyéndonos a nosotros mesmos.

Castro San Chuis

PATRIMONIU EN PELIGRU DE DESANICIU

Anguaño fálase abondo de la conservación de la biodiversidá y el patrimoniu natural, asina como la restauración de los ecosistemes, cuestiones importantes na llucha escontra’l cambiu climáticu. Tamién se traten temes sobre l’usu sostenible de la biodiversidá y la so importante na creación d’empléu verde p’avanzar nun modelu de desendolcu sostenible.

La biodiversidá, los paisaxes en xeneral, fueron conservaos poles persones que trabayen, viven y lluchen nes zones rurales, ya que’l so conocimientu llogró que’l paisaxe siga vivu. Pero, ¿qué facemos con esti patrimoniu cultural inmaterial? ¿Quién protexe’l conocimientu autóctonu?

Paisaje visto desde Urbiés (Turón, Asturias)

Paisaje visto desde Urbiés (Turón, Asturias)

El primer fin de selmana de xunu celebróse n’Urbiés (Turón, Asturies) el certamen del Quesu d’Urbiés. Trátase d’un quesu de sabor y golor fuerte, un sabor mui potente con toques amargos. Un quesu ideal pa toles persones amantes de los bonos quesos, un quesu que nun tien na qu’envidiar a los quesos más famosos. Por desgracia, ye un quesu en peligru de desaniciu. Si, nun hai sólo animales o plantes en peligru, tamién hai productos tradicionales que tan a puntu desapaecer. Pero, lo más grave ye que tamién hai persones en peligru d’estinción, les guardianes del conocimientu.

Certamen del Quesu d'Urbiés 2015

Certamen del Quesu d’Urbiés 2015

Ye hora d’entamar a falar sobre la recuperación d’alimentos y saberes [gastronómicos] llocales, tratar d’involucrar a les “persones indíxenes” nel fomentu del empléu verde. Los nuesos paisaxes nun son paisaxes naturales o paisaxes culturales, son también paisaxes gastronómicos: vaques, cabres o oveyes pastiando, cereales medrando nes tierres, colmenes, molinos, cuadres, paneres, horros, castañares, ablanares…etc. ¿Por qué les empreses de turismu nun entamamos a facer interpretaciones de los nuesos paisaxes gastronómicos? El paisaxe nun ye sólo flora, fauna y roques, ye conocimientu autóctonu.

Quesu d'Urbiés

Quesu d’Urbiés

El paisaxe tien una funcionalidá y esta pue ser fundamental nel desarrollu rural, na creación d’empléu verde y nel enfotu por aumentar la población nes zones rurales. Pero, pa facer esto debemos involucrar a les persones llocales. ¿Por qué nun facemos un taller d’ellaboraciñon de Quesu d’Urbiés? Qué nos enseñen les escases queseres que queden a ellaborar esti deliciosu productu, y a apreciar y conocer el nuesu patrimoniu. Quizás daquien s’anime a vivir n’Urbiés y alcuentre nesti maravillosu entornu rural de la zona alta del Valle Turón un llugar pa vivir y trabayar, y, sobre too, volver ver vid nel paisaxe, porque les persones tamién somos biodiversidá.

#SOSMunduRural

Paisaje típico de la zona central asturiana

Paisaje típico de la zona central asturiana

ASTURIES. UN PAISAXE CONVERTÍU NUN MUSÉU ETNOGRÁFICU

Nos últimos años algamó muncha importancia la política de protección d’espacios naturales como clave pa la ordenación del territoriu. Los Espacios Naturales Protexíos d’Asturies representen un porcentaxe superior al 30%, un datu mui altu comparáu col 10% nel restu del estáu. Esta protección pretende facer compatible la conservación de la naturaleza col usu racional del territoriu, ye dicir, el caltenimientu e les actividaes económiques tradicionales, asina como’l fomentu de la educación ambiental, la investigación, l’ociu, y el desendolcu rural nestos espacios protexíos.

Turón, Asturias

Turón, Asturias

Cuando falamos de naturaleza siempre tamos refiriéndonos a la conservación de la biodiversidá o xeodiversidá (anque esta última paezse más a la hermanastra fea de les ciencies naturales). Elementos bióticos o abióticos que tamos obligaos a caltener y conocer. Pero l’hábitat o ecosistema d’estos seres vivos o inertes ye’l mesmu nel que les persones establecimos los nuesos ogares dende enantes del 7.000 a.c. cuando les primeres civilizaciones se seres humanos entamen a facese poblaciones sendentaries.

A lo llargo de toos estos miles d’años, el paisaxe sufrió delles tresformaciones. En dalgunos casos nun cabe dulda de que dexaron una ferida que va tardar munchu tiempu en curase como na Campa Tormaleo (Ibias) o na Cuenca Carbonífera Central, onde la minería llegó con suaños y ilusiones y destrozó tolo que se-y ponía por delantre hasta dexar tristures y abandonu nes zones rurales. N’otres ocasiones, les poblaciones deprendieron a convivir cola fauna llocal, como sucede nel suroccidente asturianu col osu pardu. Un paisaxe nel que podemos ver les muestres culturales qu’estes poblaciones llocales dexaron a lo llargo de la hestoria y que yá formen parte de la nuesa cultura.

Paisaxe abandonáu

Paisaxe abandonáu

¿Qué ta pasando n’Asturies? Cabanes de teitu d’escoba, corros, cortinos, molinos, cuadres, cases tradicionales asturianes, horros y paneres, brañes y mayaes,… Un paisaxe que nos tamos empeñando en llamar paisaxe de cuentu y que paez que ta ehí pa que vengan los turistes, como quien va a un muséu y mira un cuadru a más de 50 centímetros de distancia, pero nun puede pasar esa cinta colorada que llimita’l contautu cola obra d’arte. Y, vamos ver, ¡qué soi la primera que quiero que vengan los turistes, vivo d’ello! Pero tamién quiero que tol mundu vea’l nuesu patrimoniu natural y cultural, que tastien la nuesa gastronomía, que conozan la nuesa artesanía, que disfruten almirando los paisaxes tan diferentes que tenemos, pero que tamién conozan a los nuesos paisanos y paisanes.

Cabanas de teitu d'escoba en Somiedu

Cabanas de teitu d’escoba en Somiedu

¿Qué quiero dicir con esto? Qu’Asturies ta sufriendo un grave abandonu que la ta llevando a la so tresformación nun muséu etnográficu de baldre al aire llibre. Un territoriu onde cualesquier elementu bióticu, abióticu o cultural solo tien usu como elementu decorativu. Tamos escaeciendo a les zones rurales y la so capacidá de creación d’empléu, asina como la so importancia nel caltenimientu de la biodiversidá. Si les zones rurales tan poblaes, los paisaxes van tar tamién enllenos de vida, y van tener quien cuide d’ellos.

Panera

Panera

Son munches les coses de les que quiero falar, pero pa entamar quiero poner l’énfasis nes conversaciones con mio güelita, la mio maestra na vida. Diálogos al pie la cocina carbón, mientres veíemos l’Aramu y les Ubiñes cola so borrina característica, nos que les castañes y los cereales centraben la nuesa atención, “porque quitaron muncha fame os tiempos nos que nun teníemos nada”, dicía mio güela, “y agora naide quier saber na del pueblu, y van morrer toos”, siguía. Anguaño, les castañares tan enfermes y los ablanares secando. Ensín una xestión forestal tradicional d’estos árboles nun van quedar nin ablanes nin castañes, daqué que n’El Bierno o Galiza yá supieron ver y punxeronse les piles. Enantes los frances compráben-yos les castañes pa facer el marron glace, agora, compren-yos el marron glace. ¿Nun ye esti un mensaxe cargáu d’optimismu? Amás, si lo llevamos a términos de conservación, les ablanares formen les sebes, y esto tien una gran importancia pal equilibriu ecolóxicu y la biodiversidá.

Casa enllena de maleza

Casa enllena de maleza

Por otru llau, los cereales. ¿Daquién dulda de la importante cultura del pan qu’hai o tuvimos n’Asturies? Nun sé si falar en pasáu o pensar que tovía hai esperanza y que nun morrió esta cultura. Maíz, trigu, centén, escanda,…Yo medré nel territoriu de la escanda <<y tamién de la minería>>, na zona central asturiana, anque yo yá nun viví esti cultivu na mio familia. La hestoria minera casi acaba con esti cereal autóctonu, y cuando taba agonizando, una empresa recuperolu. Pero, ¿Qué pasa colos molinos? ¿Por qué nun tratar de recuperar tamién esti elementu etnográficu? Sería mui guapo volver da-yos vida, como nos la dieron a nosotros, que nun quede sólo reflexao nes canciones tradicionales que se canten en pequeños círculos. Podemos crear puestos de trabayu, dinamizar les nueses zones rurales y conocer parte de la nuesa hestoria reciente. Qu’estos elementos nun sirvan solo pa decorar, cual muséu etnográficu, los caminos de los montañeros, sacase una semeya, y volver escaecese d’ellos.

El centén ye un cereal típicu del occidente asturianu, con un clima más favorable pal so cultivu. Ye mui típico topar nes panaderíes d’esa zona pan de centén, pero nun ye tan común ver cultivos de centén. Si entrugues porqué, la rempuesta ye cenciella “nun ye rentable”, asina que compren la farina fuera d’Asturies. Y mientres, los nuesos molinos cayendo, y una fuente d’ingresos del cultivu de centén, desaprovechada.

Molín

Molín

Podría siguir igual de crítica colos teitos y la so conversión tamién nun muséu etnográficu, o les cases tradicionales asturianes cayendo xunto colos horros y paneres, pero prefiero mandar un mensaxe d’optimismu, yá que esti post ta siendo mui llargu. Na cabera publicación del Blog falemos de Miel de Outurelos, una pequeña empresa d’Ibias que ta promoviendo la dura tarea de restaurar y recuperar los cortinos. ¿Nun ye mui guapo ver estos elementos etnográficos otra vegada con vida que velos cubiertos pola maleza o cayendo? Ye mui emotivo ver qu’un mozu quier quedase a vivir nel so pueblu, que ta ganando perres con ello, y que, por fin, daquien pudo pasar la cinta colorada del muséu etnográficu, ensín que’l guarda de seguridá-y dixera nada, pa reivindicar que les pieces del muséu tan vives, y que-yos queda muncha xera tovía.

Les zones rurales nun son museos. Por favor, nun pongamos más barreres al emprendimientu rural. Vamos escuchar a les persones llocales.

Cortín abandonado en Parque Natural de Fuentes de Narcea, Degaña e Ibias

Cortín abandonado en Parque Natural de Fuentes de Narcea, Degaña e Ibias

 

¡Salvemos les zones rurales! #SOSMunduRural

 

PRIMER CONGRESU SOBRE L’OSU PARDU: conservación, ordenación y desarrollu rural

Los díes 29 y 30 d’abril celebrose nel Parador de Courias en Cangas el primer congresu sobre l’osu pardu cantábricu, que foi estructuráu en tres árees: conservación, ordenación y desarrollu rural. Los espertos punxeron sobre la mesa la necesidá d’establecer una regulación pa qu’esta actividá turística se faiga de manera responsable y sostenible.

Andrés Ordiz, Doctor en bioloxía de la conservación, llegó a la conclusión de que la observación directa de cualisquier gran mamíferu, como osos, llobos o incluso venaos (como pasa durante la berrea) pue camudar los hábitos d’estos animales debío a la cercanía cola que se faen estos avistamientos munches veces. Estos son animales d’hábitos diurnos que, cola persecución hestórica que sufrieron, pola caza o el turismu, muestren mayor actividá a primeres y últimes hores del día, calteniéndose inactivos nes hores centrales del día.

 Andrés Ordiz

Andrés Ordiz

El turismu debe ser favorable a la conservación y debe tener un fin educativu. Esti tipu d’ecoturismu debe tar xuníu a la concienciación de la población sobre la importancia d’estos mamíferos, pero teniendo en cuenta que nun son los únicos habitantes del territoriu, sinon que les persones formen parte del mesmu ecosistema, y que dambes especies tamos condergaes a entendenos y convivir nel mesmu espaciu.

Esti tipu de turismu responsable favorez tamién al desarrollu rural. L’osu ye una escusa p’atraer viaxeros y mostra-yos un territoriu desconocíu y auténticu con una bayura inmensa de recursos naturales y culturales tovía por descubrir. Les persones contribuyen a la conservación del paisaxe, y tamién formen parte de la biodiversidá, y les sos espresiones culturales son dignes de que s’enseñen a los visitantes d’una manera holística, ye dicir, conocer l’entornu cultural y natural nel que vive l’osu pardu. El turismu vinculáu al osu pardu nun ye sólo observación direuta, sinon que podemos ver el so hábitat, como güelgues y rastros, que ye’l mesmu territoriu que’l d’otros animales como llobos, o tamién enseñar la flora o la xeoloxía.

Guillermo Palomero. Presidente de la Fundación Oso Pardo

Guillermo Palomero. Presidente de la Fundación Oso Pardo

Un problema mui grave pal caltenimientu d’estos animales ye l’usu de les redes sociales y Internet. Les persones descubren al traviés d’Internet les coordenaes onde se topa l’animal, a vegaes, en tiempu direutu. Nun se trata sólo de poner en riesgu al animal, sinon que son les propies persones quienes se ponen en riesgu pola aventura de tener cerca al plantígradu. Estes persones métense na viesca, pudiendo perdese, sufrir caídes o mancaures, o nel peor de los casos, sufriendo ataques d’animales. Amás, los coches de los observadores queden nel mediu de les carreteres siendo un grave peligru pa la circulación.

Por otru llau, tamién quedó mui claro que nun se puede conservar la biodiversidá ensín tener en cuenta la ganadería, l’agricultura o la xestión forestal. Ye importante reconocer a les persones que trabayen nes zones rurales y qu’apuesten pola conservación de les races autóctones o especies vexetales llocales. Siempre se nos escaez que tamién son animales importantes a protexer y conservar, y que tamién contribuyen a caltener el paisaxe mediante’l desendolcu d’actividaes económiques sostenibles. Hai 123 races autóctones en peligru de desaniciu. La Fundación Félix Rodríguez de la Fuente apuesta por un consumu responsable, y pa ello creó ConSuma Naturalidad, un proyeutu y sellu de calidá en favor del consumu responsable. Esti sellu, amás de beneficiar o premiar a los productores que faen un bon llabor sostenible, tamién favorez que los consumidores conozan lo que tan comiendo y qu’ello contribuye a la conservación de la biodiversidá. Tratase de fomentar el consumu responsable y poner en valor los productos de races autóctones y variedaes llocales.

Odile Rodríguez de la Fuente

Odile Rodríguez de la Fuente

Un exemplu d’esto ye’l gran llabor que fai Alberto Uría, quien ta al frente de la marca Miel d’Outurelos. Esti mozu apicultor artesanu apostó por quedase nel so pueblu d’Ibias y recuperar l’oficiu familiar. Naide dulda anguañu de que l’apicultura contribuye al caltenimientu de la biodiversiá gracies a la aición polinizadora de les abeyes, pero amás d’esto, esta pequeña empresa tien alcuerdos de Custodia del Territoriu, reconstruyendo cortinos d’Ibias y Degaña, ente otros proyectos. Esti elementu etnográficu sirve pa tener protexíes del osu les colmenes, pero baxo’l mio puntu vista, lo más importante ye qu’Alberto ta volviendo dar vida a los cortinos pa que la zona nun se convierta n’otru muséu etnográficu y vuelva tener vida. Un productu con valores que recuperó l’arume y sabor tradicional. La so esposición nel congresu, crítica y emotiva, valió-y un gran aplausu de toles persones qu’ellí tábemos escuchándolu.

Alberto Uría. Fundador de Miel de Outurelos

Alberto Uría. Fundador de Miel de Outurelos

Como conclusión personal el turismu realizáu d’una manera sostenible y responsable contribuye al desendolcu rural de la zona visitada y, lo más importante, exerce una conciencia ambiental y social sobre los viaxeros y viaxeres, asina como xenerar beneficios económicos direutos nes poblaciones visitaes.

Avistamientu d'Osu Pardu cola Fundación Oso Pardo y Quei Vitorino Experiencias Medioambientales

Avistamientu d’Osu Pardu cola Fundación Oso Pardo y Quei Vitorino Experiencias Medioambientales