Paisaxes con encantu

L'ORIXE DE LOS PASTOS DEL PARQUE NACIONAL PICOS D'EUROPA

Cualisquier paisaxe puede mostrase diferente a los güeyos de cada persona. Unes persones fíxense más nes flores, otres nes biesques, otres nes piedres o los fósiles, otres nel modeláu glaciar, y otras nes güelgues y señes que dexaron sol paisaxe los seres humanos que vivieron nun territoriu a lo llargo la so hestoria. El paisaxe ye un llibru con bayurosos capítulos, y caún d’ellos tien la so respectiva interpretación: un capítulu ta dedicáu a la botánica, otru a la fauna, tamién la xeoloxía tien la so parte importante nel llibru,… Auque esistan munchos capítulos escritos nel paisaxe, con diferentes y múltiples temátiques, toos ellos tienen rellación coles persones, siendo esti’l capítulu más importante y más estensu que se escribiera nel paisaxe, nel territoriu. Un capítulu que nun va terminar enxamás d’escribise, que sigue vivu, y qu’esperemos que nunca tenga un final.

Vaques na redolada del Llagu Ercina

Vaques na redolada del Llagu Ercina

Esti ye’l primer artículu dedicáu a la interpretación del patrimoniu y a lleer el paisaxe, con enfotu a la estrecha rellación ente los seres humanos y la natura. Nesti casu queremos falar sola importancia de la xeoloxía pa la vida de les persones, pa la vida de los pastores de los Picos d’Europa. Porque les persones y la natura necesítense mutuamente. Queremos, amás, que seya un homenaxe enllenu de ciñu, pa dalgunos quiciabes un poco raru, a los ganaderos de Picos d’Europa.

¿Dalguna vegada vos preguntareis por qué’l Parque Nacional Picos d’Europa ye tan importante y favorable pa la ganadería? La xeoloxía tien un papel perimportante y básicu nello. Esti artículu, ensín ánimu d’entrar en términos técnicos o científicos, va facer un resume de más de 500 millones d’años d’hestoria xeolóxica del Parque Nacional, una hestoria cola que, en munchos casos ensín percatase, conviven los ganaderos de Picos d’Europa.

Les roques tamién son perimportantes pa les aves, yá que ye'l llugar qu'escueyen munches especies pa poner el nial

Les roques tamién son perimportantes pa les aves, yá que ye’l llugar qu’escueyen munches especies pa poner el nial

Son dellos los procesos que lleven a qu’estes montañes, en particular, y al Cordal Cantábricu, en xeneral, tengan la configuración que tienen anguaño. La hestoria xeolóxica del Parque Nacional ye llarga y complexa, y remóntase a más de 500 millones d’años, cuando nun había montañes, cuando too yera un ambiente costeru, más típicu de climes tropicales, siendo estes les roques más vieyes que formen el Parque Nacional. A lo llargo de más de mediu millón d’años, como consecuencia del desplazamientu de les plaques tectóniques, los cambeos de latitú, asina como los procesos de deformación que sufrieron les roques d’esti territoriu, y ensín escaecenos de los cambeos nel nivel de la mar, el sedimentu (que col pasu los años forma les roques) foi acumulándose n’ambientes mui diferentes ente sí: dende mares profundos, a mares más cerquina la costa, deltes o ríos. Anque, ensín dulda, la roca caliar del Carboníferu, la que domina en Picos d’Europa y los cumales más importantes, indiquen qu’esti territoriu tuvo baxo’l mar durante munchos millones d’años.

Fotografía realizada desde la cima del Cotalba

Semeya fecha dende’l cumal del Cotalba

Otru de los episodios xeolóxicos que más “personalidá” donó al Parque Nacional foi la oroxenia Alpina. Etapa na que les roques que se depositaron nesti tiempu, se llevanten pa formar el Cordal Cantábricu. Esti procesu entamó hai, aprosimadamente, 50 millones d’años, y les sos consecuencies fueron la formación de los montes, colos sos desniveles y altor, amaos por montañeros y senderistes, y onde les vaques, cabres y oveyes s’alimenten, siempre vixilantes por pastores, persones que trabayen nes más dures condiciones.

Un de los episodios xeolóxicos que más “personalidá” dió al Parque Nacional foi la oroxenia Alpina. Etapa na que les roques que se depositaron nesti tiempu, se llevanten pa formar el Cordal Cantábricu.

Semeya fecha dende'l H.ultayu

Semeya fecha dende’l H.ultayu

Una vegada que se forma’l Cordal Cantábricu, pa tener la forma que tien anguaño, influyen dellos factores, como’l tipu roques qu’hai, l’aire, l’agua o los cambeos nel clima, ente otros. Como exemplu d’influencia climática, los fenómenos glaciares entamaron hai, aprosimadamente, 100.000 años, y tuvieron importancia na forma del paisaxe, dexándonos llagos, valles o circos glaciares, ente otros, que dan forma a un paisaxe d’ensueñu.

Fenómeno de glaciarismo en el entorno de los Lagos de Covadonga

Fenómenu de glaciarismo nos Llagos de Cuadonga

Tampoco vamos escaecenos la aición de los ríos, resultáu del poder erosivu del agua sola roca caliar. El Parque Nacional asítiase dientro les cuenques hidrográfiques de los ríos Sella, Deva y Cares. De fechu, el ríu Sella y el ríu Deva marquen los llímites occidental y oriental, respeutivamente, del Parque Nacional. Amás, el ríu Cares y el Duje, afluente del Cares, separten esti territoriu en tres macizos: Occidental o del Cornión, Central o de Los Urrieles y Oriental d’Andara. Esta importante dinámica fluvial dió como resultáu los más impresionantes desfiladeros o cañones, como Los Beyos o El Cares.

El Ríu Cares

El Ríu Cares

Si hai un procesu perimportante pal ganáu, esi ye’l procesu de disolución de la roca caliar, la karstificación.

Si hai un procesu perimportante pal ganáu, esi ye’l procesu de disolución de la roca caliar, la karstificación. Esti procesu ye la consecuencia de l’acición del agua, lo que fixó que’l Parque Nacional seya un de los sistemes kársticos con mayor fama ya importancia mundial. Esti procesu manifiéstase en superficie por formes como fisures nes roques, depresiones (llamaes dolines o h.ous), “poljés” o valles ciegos. La roca caliar ta formada por carbonatu cálcicu, pero amás contienen materiales insolubles o “impureces”, como les arcilles, polo que al disolvese la roca caliar xenera arcilles de decalcificación que s’acumulen sola roca caliar. Esto aporta unos nutrientes de calter escepcional, ye dicir, la base pa los pastos de Picos d’Europa, onde guarez el ganáu, debe la so importancia al procesu de disolución de la roca caliar. Anque esti procesu, de xuru que ye tamién el causante de les bayuroses pérdides nes cabeces de ganáu, yá que puen cayer al traviés de los h.ous que conecten coles cueves soterrañees. Asturies, en xeneral, y Picos d’Europa, en particular, ye como un quesu gruyère, yá que nel so interior guarda grandes ayalgues, que sólo los espeleólogos más temerarios descubrieron, siendo esti territoriu consideráu como l’Himalaya de los espeleólogos. Dalgunes de les sos principales simes tópense ente les más profundes del mundu.

Poljé de Comeya

Poljé de Vega de Comeya

Los Picos de Europa considérense como l’Himalaya de los espeleólogos. Dalgunes de les sos principales simes tópense ente les más profundes del mundu.

Como acabamos de ver, too esti complexu territoriu ye’l paisaxe que almiren tolos díes los nuesos paisanos y paisanes, el so hogar, el so centru de trabayu, un entornu que curien y respeten, un paisaxe nel qu’ellos y elles escribieron. La xeoloxía tuvo munchu pesu nesta hestoria, na so hestoria. Porque la xeoloxía ye perimportante pa estes persones, yá qu’amás de xenerar el pastu nel que guarez el ganáu, los cumales a los que tienen que s’enfrentar pa desendolcar el so noble trabayu, tamién-yos aporta los recursos necesarios pa construyir les sos cabañes y mayaes. Debemos protexer esti trabayu en peligru de desaniciu, el pastoréu de Picos d’Europa, pero tamién debemos protexer, conservar y caltener el nuesu entornu, el nuesu hogar, porque los paisaxes qu’almiramos son el resultáu de millones d’años de trabayu de la natura, y nun los debemos echar a perder pola nuesa incomprensión ya idees enquivocaes.

Güe pastiando nos Llagos de Cuadonga, onde podemos ver los impresionantes desniveles del territoriu, los valles y circos glaciares, y tamién los fenómenos de disolución de la roca caliar

Güe pastiando nos Llagos de Cuadonga, onde podemos ver los impresionantes desniveles del territoriu, los valles y circos glaciares, y tamién los fenómenos de disolución de la roca caliar

Debemos protexer esti trabayu en peligru de desaniciu, el pastoréu de Picos d’Europa, pero tamién debemos protexer, conservar y caltener el nuesu entornu, el nuesu hogar, porque los paisaxes qu’almiramos son el resultáu de millones d’años de trabayu de la natura, y nun los debemos echar a perder pola nuesa incomprensión ya idees enquivocaes.

 

LOS LLUGARES MÁS PRESTOSOS D’ASTURIES: Capítulu 1

EL MOFRECHU

El Mofrechu ye la cima más alta del conceyu de Ribeseya (891 metros), y una ruta perfeuta pa contemplar el paisaxe d’Asturies. Un mirador de la costa y montaña orienta mui afayaízu, y con una panorámica directa de los Picos d’Europa.

La ruta entama nel colláu d’Ixena, y a lo llargo d’un cómodu senderu hasta lo cimero del picu, vamos poder almirar les mayaes de pastores, los cordales del Sueve y del Cuera, el cordal del Aramu, la Reserva la Biosfera y Parque Natural de les Ubiñes y la Mesa, y la zona Payares.

Calzáu cómodu, botella d’agua, crema solar y gorra, son los requisitos pa facer esta escursión de sólo 2 hores (ida y vuelta). Un llugar privilexáu na zona oriental asturiana, con unes vistes a Ribeseya que nos dexarán mudos.

Recomendamos dir con tiempo abondu, bocadillu y cámara fotos, yá que vamos querer quedanos ellí hores y hores disfrutando de les vistes d’Asturies.

El Mofrechu

LES FOCES DEL PINO

Esti Monumentu Natural asitiáu nel conceyu d’Ayer, na Montaña Central d’Asturies, ye un pequeñu desfiladeru escaváu pola aición del agua sobre la roca caliar nel tramu mediu del ríu Pino. Una estrecha foz de paredes casi verticales, que en dalgunos puntos nun supera los 6 metros d’anchu, y pol so calce pasa l’agua de so, rompiente per permunchos rápidos y tabayones.

El ríu Pino ye un arroyu de montaña de sólo 6 Km de llargu. Esti cursu d’agua naz en Pena Reonda, y desemboca nel ríu San Isidro, nel pueblu de El Pino, el mesmu llugar d’onde sal la senda a les Foces del Pino. La ruta pasa por una biesca onde vamos ver texos, carbayos, fayes, castañares, ablanos y gorbizos, ente otros, pero también brañes, polo que nun ye raro que nel nuesu camín nos topemos con dalgún ganaderu que fai diariamente’l Camín p’atender el so ganáu, y que nos falará amablemente.

Un recorríu perfeutu pa facer en cualisquier época del añu, yá que ye espectacular nel iviernu, pa ver los cumales nevaos, o primavera, onde veremos los árboles y los praos enllenos de flores, pero también nel branu, onde la biesca va permitinos escapar del calor d’otres zones d’Asturies. Ensín dulda, la seronda, colos sos colores típicos, tresforma esta nuna zona máxica y maravillosa onde perdese del mundo por unes hores.

Foces del Pino

EL L.LAGU DEL VAL.LE

El L.lagu del Val.le, con un tamañu de 24 hectárees, ye’l mayor de tolos llagos d’Asturies, anque’l so tamañu ye frutu de la construcción de la represa realizada p’aprovechar les sos agües na central hidroeléctrica de la Malva.

El llagu ta ubicáu nel Parque Natural de Somiedu, y llégase a él al travíes d’un Camín que sal del pueblu del Val.le del L.lagu, pueblín cercanu a La Pola Somiedu. El llagu ta asitiáu nun circu glaciar, y el valle, con una forma típica n’U, como tolos valles glaciares, ofreznos una idea de les dimensiones que tenía’l glaciar.

Esta ye, amás, una zona pefeuta pa practicar Birdwatching: perdiz parda, esguilatorres, utre, zapiquera, águila blanca, águila negra, graya del picu mariellu o gurrión de neveru, son dalgunos de los páxaros que vamos poder ver na nuesa visita a la zona. Amás, podemos ver güelgues y rastros d’animales como osos y llobos (con suerte, hasta vamos poder avistalos) y robecos nos cumales de la rodiada.

Amás de pol so interés natural, esta zona conserva (con muncha dificultá) una cultura rural importante centrada na gandería. Esto puede apreciase pol gran conxuntu de brañes nes que podemos ver les cabanes de teitu d’escoba, utilizaes polos vaqueiros durante los períodos estivales.

El nuesu agradecimientu y reconomientu a les persones que llucharon por caltener y conservar el paisaxe, la biodiversidá y la cultura d’esta zona rural escaecía y maltratada.

 

BRAÑA BUXANA

Nos pies del Cordal del Aramu, nel conocíu como “xardín del Aramu”, tópase la Braña Buxana, nos Puertos d’Andrúas. Trátase d’una vieya cabana de piedra, de planta cuadrada y col techu de tapinos de yerba. Esta cabana, denominada también como “Cabana de Villanueva”, yá que yera usada polos vecinos de la capital del conceyu de Santu Adrianu nel so trabayu ganaderu. Na zona hai restos d’otres cavanes y de corros, asina como d’un posible campu de dólmenes.

El Camín hasta esti llugar sal del pueblu de La Rebollá, en Quirós, una senda al traviés d’un antiguu camín medieval que tovía conserva l’empedráu orixinal, y dende’l que podemos almirar un paisaxe típicamente ganaderu. Si miramos pa les cimes del entorno, podemos ver numberosos utres y zapiqueres.

Un llugar espectacular, prácticamente desconocíu y 100% recomendable la so visita.

Cabaña con el techo de hierba en la braña

TRABÁU

Si hai dalgún llugar n’Asturies que presume de ser el parísu inesploráu ye Degaña, y concretamente, el pueblu de Trabáu. Esta zona, xunto con Astierna, El Bao y El Corralín, pertenez a la tierra de cunqueiros o tixileiros, artesanos que s’encargaben de la talla de maera mediante un tornu a pie, col que facíen elementos de la vaxilla: escudielles, cachos, platos, vasos y otres pieces diverses, que lluéu vendíen. Cuando llegaba la seronda, entamaben camín pal Sur, Andalucía y Extremadura, onde vendíen la so producción y tornaben en primavera col aceite y otros productos. Estes persones tienen incluso una llingua propia, la tixileira o tixileiro. N’El Rincón del Cunqueiru, en Trabáu, conserven tovía esti oficiu, y parte del so trabayu ye dar a conocelu a tolos viaxeros o viaxeres que quieran conocer esta cultura tan interesante.

Esta zona, amás, ye un entornu idílicu pa la observación del osu pardu cantábricu, actividaes d’astronomía (ye la zona d’Asturies que tien meyor clima), o interpretación del paisaxe. La biesca, los valles y los llagos glaciares (como les llagunes de Trabáu) formen un paisaxe auténticu. Ensín dulda, el paraíso inesploráu.

Cunqueiru. Degaña

 

¿Prestaronvos estos requexos d’Asturies? Vamos siguir ampliando la información nel siguientes actualizaciones con nuevos llugares d’Asturies que paguen la pena descubrir, esplorar y esperimentar.

Más información en info@llascara.es

MONTAÑA CENTRAL: NEL CORAZÓN D’ASTURIES

La Montaña Central, asitiada nos conceyos d’Ayer, Morcín, Riosa, Mieres, La Ribera y L.lena, ye una ayalga por descubrir nel centru-sur d’Asturies. Ye un llugar ideal pa facer cualisquier tipu de turismu: d’aventura, ecoturismu, familiar, cultural, pareyes,..etc., con actividaes aptes pa tolos públicos y que vos vamos describir nesti post. ¡Descubramos la Montaña Central!

Reserva Biosfera Ubiñas-La Mesa

A nivel de turismu d’aventura, nun cabe dulda que ye un llugar magníficu pa practicar cualesquier deporte de montaña (senderismu, montañismu, esquí, snowboard, raquetes de ñeve, espeleoloxía, ciclismo, escalada…), siendo los sos principales referentes la zona del Parque Natural y Reserva la Biosfera de Les Ubiñes-La Mesa, con cimes que sobrepasen los 2.000 metros d’altor y desniveles de vértigu, o también les estaciones d’esquí de Valgrande-Payares, en L.lena, y Fuentes d’Iviernu, n’Ayer.

Anguaño, súmase un referente más a esti tipu de turismu: l’Anillu Ciclista de la Montaña Central, homologáu pola Federación de Deportes de Montaña, Escalada y Senderismu del Principáu d’Asturies, baxo’l nome de GR-208. Nes nos 8 etapes, ideales pa facer BTT o incluso pa caminar, el paisaxe nun dexará de sorprendenos.

Peña Ubiña

Amás, el turismu d’aventura puede ser complementáu cola observación del patrimoniu natural, yá qu’esisten multitú de recursos dignos d’almirar, como’l texu milenariu de Santibanes, les Foces del Pinu y del Ayer, espectaculares puntos d’interés xeolóxicu o pa la observación de flora y fauna, escelentes llugares pal birdwatching y impresionantes viesques autóctones.

Foces del Pino

Esti territoriu nun presume solo de naturaleza y aventura, sinon que la historia que concentra los sos 1.000 Km2 d’estensión, bien podrían resumir la historia d’Asturies. Por exemplu, los xacimientos arqueolóxicos de la Vía Carisa, o la ilesia prerrománica de Santa Cristina de L.lena, que la UNESCO declaró Patrimoniu de la Humanidá n’avientu de 1985. La Montaña Central cuenta con capilles medievales nuna montaña de casi 1.000 metros d’altor, nel coral de la imponente mole calizo de la Sierra del Aramu. Estes capilles foron protagonistas d’una parte de la invasión musulmana que sufrió la Península, yá que foi esti’l llugar onde se guardaron l’Arca Santa y otres reliquies de Xerusalén, ente otros múltiples recursos culturales de toles époques históriques.

Picu Polio

La Montaña Central ye también una zona con una etnografía singular: horros y paneres, o también molinos, testigos de la época na qu’el cereal d’escanda dominaba na comarca. Tamién esiste un gran patrimoniu inmaterial, como cantares y bailles tradicionales, que fueron recuperaos, y que tovía tan mui vivos, como la Xota Payares o la Muñeira Carcarosa. Una historia tradicional que nel sieglu XIX entama a vivir cola historia minera, hasta casi desapaecer, viviendo sólo nel recuerdu de los sos habitantes o na red de museos de la zona. Güeñu ye una de les zones d’Asturies con más horros y paneres, y meyor conservaos. Nel Centru d’Interpretación del Horru puen contanos tolos detalles de la etnografía asturiana y nel Pobláu Mineru de Bustiellu van descubrinos l’apasionante historia minera de la Montaña Central, qu’entama nel año 2.500 a.c. coles mines de cobre del Aramu. Un recorriu pa tolos públicos que va sorprendenos gratamente.

Hórreo Güeñu

P’acabar, nun podemos escaecenos de la gastronomía, yá que como nun podía ser d’otra manera, siempre hai dalguna xornada gastronómica o escusa pa comer mui bien, y los dos quesos fundamentales na zona nun falten nos platos: quesu Afuega’l pitu y quesu d’Urbiés, esti últimu en seriu peligru de desaniciu, yá que sólo se fai pal consumu familiar. Na zona d’Ayer el postre típicu por escelencencia ye’l panchón, ellaboráu con escanda, ¡y que ta riqusísimu!

Turón

Bono, yá nun tienes escuses. ¿Cuándo vienes a conocer la Montaña Central?

¿Resérvote un día?

info@llascara.es