Sobre Lláscara



Según l’Academia de la Llingua Asturiana (DALLA) una LLÁSCARA ye:

  • “Piedra qu’asoma en suelu y que nun ta suelta”
  • “Llábana, piedra llisa y achaplada”
  • “Piedra que cuartia fácil”
  • “Terrenu con piedra que cuartia fácil”

Esta pallabra ye l’orixe de munchos topónimos n’Asturies, lo que pon de manifiestu como la naturaleza, xeoloxía, la cultura y la tradición tan mui relacionaes ente sí.

Esti nome sintetiza un sentimientu y una voluntá de divulgar el patrimoniu natural, pero tamién el cultural, como la música, el folclor, la mitoloxía, la gastronomía, l’agricultura, la ganadería, amás d’otros saberes populares. Toos ellos son aspeutos mui relacionaos ente sí, por eso LLÁSCARA enmárcase y afítase dientro de los conceptos de Ecoturismu y Desarrollu Rural.

LLÁSCARA ye un puntu d’encuentru pa toles persones que consideren que la naturaleza y el paisaxe constrúyense y caltiénense gracies a la cultura campesina. Persones esperimentaes na xestión y ordenación del territoriu que tan en posesión d’un ricu y variáu patrimoniu material ya inmaterial, que, desgraciadamente, ta a puntu desapaecer, y yá ye hora de dar a conocer.

LLÁSCARA pretende valorizar el patrimoniu natural y cultural de los territorios, asina como contribuyir al desendolcu y meyora de les zones rurales, pues la supervivencia d’estes ye una condición necesaria p’asegurar el caltenimientu de la naturaleza.

LLÁSCARA defende un desendolcu dignu del sistema campesín español, teniendo en cuenta la naturaleza tradicional de cada territoriu, promoviendo midíes que diversifiquen la producción y la so revalorización. Amás, debe favorecese el caltenimientu de les actividaes rurales, yá qu’un mediu rural vivu ye básicu pa garantizar la conservación de los ecosistemes, paisaxes y biodiversidá asociada.

LLÁSCARA pretende lluchar pa que se pongan en marcha estratexes que promuevan un Turismu Responsable y Sostenible. Ye dicir, midíes que puedan favorecer el desendolcu del Turismu Rural, pero qu’al mesmu tiempu tenga en cuenta los valores naturales y tradicionales llocales. El Turismu Sostenible y l’Ecoturismu deben servir pa favorecer el caltenimientu de la naturaleza, al mesmu tiempu que xenerar beneficios económicos directos nos territorios que se visiten.


  • Valorar, respetar y reconocer la importancia del mediu rural y los sos habitantes
  • Contribuir al desendolcu y meyora de les zones rurales.
  • Promocionar y conocer el patrimoniu gastronómicu más auténticu y vivu.
  • Convertir el Turismu Sostenible y l’Ecoturismu na estratexa turística principal de los territorios.
  • Fomentar valores de curiáu y respetu pol patrimoniu natural y cultural
  • Contribuyir a que la población desendolque’l so sentíu de responsabilidá social y ambiental, y que tome conciencia de la urxente necesidá de prestar atención a los problemes del mediu ambiente, p’asegurar que se tomen midíes adecuaes al respectu
  • Promover el consumu de productos llocales y de Km0 col enfotu de xenerar riqueza económica nes zones rurales

 

 

Abrir/Cerrar comentarios